Bul kúnderi elimizdiń konkıshileri aldaǵy maýsymǵa qyzý daıarlanyp jatyr. Alda álem kýboginiń kezeńdik saıystary, basqa da asa iri halyqaralyq dodalar bar. Al basty jarys – kelesi jyldyń aqpan aıynyń alǵashqy jartysynda Qytaıdyń Harbın qalasynda alaýy tutanatyn IH Qysqy Azııa oıyndary.
«Bıylǵy maýsymdaǵy daıarlyq jumystaryn jańa formatta ótkizip jatyrmyz, – dedi Qazaqstan ulttyq quramasynyń bas bapkeri Aleksandr Panfılov. – Aldymen búkil komanda músheleriniń basyn qosyp, oqý-jattyǵý jıynyna qatystyq. Sonymen qosa, shákirtterimizdi tórt topqa bólip, barlyǵynyń jeke daıyndyq baǵdarlamasyn jasadyq. Máselen, aldaǵy jaýapty jarystarda áıelderdiń 500, 1000 metrlik sprıntinde Alına Daýranova, Inessa Shýmekova, Krıstına Sılaeva, Margarıta Galıeva, Darıa Gavrılova óner kórsetedi. Olar – álem kýboktary men jastardyń álem birinshilikterinde jeńis tuǵyryna kóterilgen tanymal sportshylar. Qysqa qashyqtarda saıysqa túsetin sulýlarǵa quramanyń keńesshi-bapkeri Sergeı Klevchenıa jaýapty».
Sergeı Klevchenıa – 53 jastaǵy reseılik maman, kezinde beldi konkıshilerdiń biri boldy. 1994 jylǵy Lıllehammer Olımpıadasynyń kúmis, qola júldegeri, álem chempıonatynyń tolyq júlde jıyntyǵynyń ıegeri, sprınttik kópsaıystan eki dúrkin álem chempıony. Sergeı Olımpııa oıyndaryna tórt ret qatysyp, Reseı rekordyn 12 márte jańartty. Keıinnen óz eliniń bas komandasynyń aǵa bapkeri boldy. 2012 jyldan beri Qazaqstan quramasyn jattyqtyrady.
Erler arasyndaǵy sprıntshiler jarysynda Evgenıı Koshkın, Altaı Járdembekuly, Artýr Galıev, Nıkıta Vajenın, Roman Bınazarov, Andreı Semenovqa senim artylyp otyr. Olar da Reseı mamanynyń baqylaýynda. 36 jastaǵy Alekseı Esın 2010 jyly Vankýver, 2014 jyly Sochı Olımpıadalarynda baq synap, álem chempıonaty men Dúnıejúzilik ýnıversıadada qola medal ıelendi.
«Polshadan kelgen maıtalman Pavel Abratkevıch orta, alys qashyqtyqta synǵa túsetin sportshylardy daıarlaıdy. Bul komanda sapynda Nadejda Morozova, Elızaveta Golýbeva, Baqdáýlet Saǵatov, Vıtalıı Shıgolev, Aqjol Nuráli, Andreı Zýev, Asqar Ábdýmálik, Mıhaıl Glýshenko, Demıan Gavrılov bar. Al jastar quramasyna jergilikti bapker Aleksandr Jıgın jaýapty», dedi Aleksandr Panfılov.
Jýyrda Máskeý oblysyndaǵy Kolomna qalasynda oqý-jattyǵý jıynyn ótkizip qaıtqan jerlesterimiz kóp keshikpeı Germanııaǵa sapar shekti. Nemis jerindegi 20 kúndik daıarlyq barysynda olar eki birdeı álem kýboginiń kezeńdik saıystarynda baq synaýdy josparlap otyr. Odan keıin Japonııanyń Hatınohe men Nagano qalalarynda, Qytaı astanasy Beıjińde halyqaralyq týrnırlerdiń tusaýy kesiledi. Bul básekelerge el quramasy da qatysady. Al Azııa oıyndarynda baq synaıtyn sportshylar 18–20 jeltoqsan aralyǵynda jalaýy jelbireıtin el chempıonatynda anyqtalady.