Qazaqstanǵa resmı saparmen kelgen Halyqaralyq dzıýdo federasııasynyń (IJF) prezıdenti Marıýs Vızer elordadaǵy sport nysandaryn aralap, jumys barysymen tanysty, dep habarlaıdy Egemen.kz.
Marıýs myrza eń aldymen 2019 jyly paıdalanýǵa berilgen Jaqsylyq Úshkempirov atyndaǵy Jekpe-jek saraıyna bardy. Jekpe-jek saraıy – kúres túrleri (grek-rım, erkin, áıelder kúresi, dzıýdo, karate, taekvondo, aralas jekpe-jek) boıynsha halyqaralyq jarystardy ótkizý múmkindigi bar biregeı sport kesheni. Jekpe-jek saraıynan keıin IJF basshysy 2025 jyldyń sońynda aıaqtalatyn Ulttyq sport ýnıversıtetiniń qurylysymen tanysty.
Budan bólek mártebeli meıman balǵyn palýan balalarmen, belgili qazaqstandyq sportshylarmen kezdesti. Olardyń qatarynda Parıj Olımpıadasynyń qola júldegeri Ǵusman Qyrǵyzbaev, Parıj Paralımpıadasynyń chempıony Aqmaral Naýatbek, álem jáne Azııa birinshiliginiń júldegeri Ábıba Ábýjaqynova, 2009 jylǵy álem chempıony Maksım Rakov bar. Kezdesý barysynda Qazaqstanda dzıýdo sportyn damytý jáne halyqaralyq arenaǵa shyǵý múmkindigi sóz boldy.
«Astanaǵa kelgenime jáne sizdermen kezdeskenime qýanyshtymyn! Búgin birneshe sport keshenin aralap, tamasha sport ınfraqurylymdarymen tanystym. Bul nysandardyń kez kelgeni halyqaralyq deńgeıdegi jarystardy qabyldaýǵa múmkindigi bar. Sondaı-aq Astanada salynyp jatqan Ulttyq sport ýnıversıtetiniń qurylysyn kórdim. Biregeı bilim ordasy Qazaqstannyń sport salasyndaǵy kásibı mamandaryn daıarlaýda mańyzdy ról atqarary daýsyz», dep atap ótti Vızer.