Qazaqtyń shalǵaıdaǵy bir aýylynan shyǵyp, álemdik deńgeıdi baǵyndyryp, ǵalamdyq keńistikke shyqqan talanttardyń birin bilsek, birin bilmeı jatamyz. Esimin el tanysa da ýaqyt óte kele umytyla bastaǵany da bar. Máselen, óner áleminde Erik Qurmanǵalıevtiń esimi erekshe qubylysqa balanady. Birtýar talanttyń ánshilik tulǵasy kúlli qurlyqty tańǵaldyrdy. Bir-aq sátte qaıtalanbas daýysy shartarapqa jaıylyp ketti.
Álemdi aýzyna qaratqan ánshi 1959 jyly Atyraý oblysynyń Jylyoı aýdanynda, Qulsary kentinde dárigerler otbasynda dúnıege kelgen. Bala kezinen mýzykaǵa qumartqan jas talant Almatyǵa arman qýyp keledi. Qurmanǵazy atyndaǵy konservatorııanyń daıyndyq bólimine oqýǵa túsip, úlken ónerge umtylady. Áıel daýysty er ánshiniń klassıkalyq týyndylardy oryndaý sheberligi, onyń vokaldyq óneri konservatorııadaǵy ustazdar qaýymy men mýzyka mamandaryn eriksiz tańǵaldyrady. О́ner ıesiniń sırek daýysy bar nazardy jaýlap, ózi de talantynyń alabóten ekenin túısine bastaıdy.
«Konservatorııa rektory Ǵazıza Ahmetqyzy jas jigittiń tym bólek daýysyn tyńdap júrip, bir kúni ózine shaqyryp alady da: «Shyraǵym, seniń daýysyńmen jumys isteıtin pedagog bizde joq, munda daýysyń ózgerip ketedi, sen Máskeý konservatorııasyna baryp tús, sonda ǵana bir kisi bar» dep keńes beredi» dep jazady Saýytbek Abdrahmanov «Eldik syny» kitabynda. Osylaısha, óz deńgeıine laıyqty bilim izdegen ónerpaz Máskeýden bir-aq shyǵyp, Gnesınder atyndaǵy mýzykalyq ınstıtýtqa qujat tapsyrady. Qabyldaý emtıhanynda «Orlean bıkeshi» arııasyn oryndap, tyńdaýshylardy ekiudaı kúıge túsirgen. Qazaq balasynyń kókke shanshylǵan alt daýysy kásibı mamandardy tańǵaldyrǵany anyq. Árqashan ózin-ózi ósirýge, damytýǵa qumar óner ıesi Máskeý mýzyka ınstıtýtyn bitirgen soń bilimin P.I.Chaıkovskıı atyndaǵy Máskeý konservatorııasynyń aspırantýrasynda jalǵastyryp, N.Dorlıak, L.Bener, A.Reınolde, F.Kertın, R.Keısellı syndy professorlardan sheberlik sabaqtaryn alady. Oqýmen qatar fılarmonııada, Stas Namınnyń mýzykalyq ortalyǵynda jumys isteıdi. 1987 jyly Hertogenboshede ótken jas oryndaýshylardyń halyqaralyq baıqaýynda top jaryp, laýreat atanady. 1988 jyly Bostonda ótken halyqaralyq mýzyka festıvalinde «Fenomen» dep tanylyp, ataǵy álemge jaıylady. Vokal ónerindegi erekshe qubylys retinde Gınness kitabyna enedi jáne ony aty ańyzǵa aınalǵan ıtalııalyq ánshi Fedora Barbıerımen qatar qoıyp dáripteıdi. Sırek daýystyń dıapazony odan saıyn keńeıip, ataǵy aspandaı beredi.
О́mirdiń, álde ónerdiń jazylmaǵan zańdylyǵy solaı ma, erekshe talanttar taǵdyrly keledi. Erik Qurmanǵalıev te taǵdyrly tulǵa. Keńes odaǵyndaǵy alǵashqy kontrtenordyń shyǵarmashylyǵy týraly reseılikter «Daýys», «Alttiń oıanýy», «Sálim-Merýert» atty derekti fılmder túsirdi. «Aty ańyzǵa aınalǵan adam» dep áspettedi.
«Men tabıǵatymnan kosmopolıt ánshimin. Maǵan Jer sharynyń qaı qıyry da jat emes. Eshqandaı dinı ustanymym joq», deıdi ózi «Moskovskıı komsomoles» gazetine bergen suhbatynda. Iá, ónerde de, erekshe ónerpazdyń talǵam-kózqarasynda da shekara joq. Sırek daýysy tunshyqpaǵan sahnanyń bárinde shyrqaı bereri anyq.
Aqyn Marjan Ershý «Erik Qurmanǵalıev» atty kitap jazǵanyn bilemiz. Atalǵan eńbekte taý-tulǵanyń balalyq shaǵynan bastap, qysqa ǵumyrynyń qyrly-qatparly tustary da baıandalady.
«Erik Qurmanǵalıev ómiriniń, óneriniń juldyzdy shaqtaryn elinen jyraqta, Máskeýde ótkizdi. Máskeý onyń talantyna, bolashaǵyna jarqyn jol siltegen qasıetti meken boldy. Arasynda Qazaqstanǵa konsertpen kelgende de, qazaqtyń belgili opera juldyzdarymen etene jaqyn aralasa qoımaǵany aıqyn. Múmkin, ýaqyty bolmaǵan shyǵar. KSRO Halyq ártisi, ataqty ánshi Roza Jamanova apamyzben ómiriniń sońǵy kezderinde kezdesip, Erik týraly estelik aıtýyn suraǵanymda, ol kisi syrqattanyp júrgenin tilge tıek etip: «Erik Qurmanǵalıev – ǵajap talant!» dedi biraýyz sózben jaılap qana», dep jazylǵan kitapta.
Vokal ónerine eshkim boljamaǵan qubylys bolyp kelgen týma talanttyń ǵumyry bir-aq sátte shoq juldyzdaı aǵyp ótti. Atyraýdyń alaqandaı aýlynan shyqqan sırek daýystyń kúlli álemge, túgel aspanǵa jetkeniniń ózi tańǵajaıyp oqıǵa emes pe? Mundaı sheksiz talant, sheksiz mártebe, sheksiz tańǵalys bir qazaqqa buıyrǵany búginde ulttyń baǵyn asyryp tur.