Sońǵy bes jyldan beri Túrkııanyń Prezıdent janyndaǵy Kadrlyq basqarmasynyń úılestirýimen 10 túrli elde 15 ret jumys berýshiler men bolashaǵy bar jastardyń basyn qosatyn TalentforBIZ mansap jármeńkesi turaqty ótip keledi. Kúni keshe Almatyda ótken aıtýly sharaǵa qatysqan Qazaqstan jastary da osyndaı múmkindikke ıe boldy, dep habarlaıdy Egemen.kz.
Kezdesýge Túrkııa Respýblıkasy Prezıdent basqarmasynyń «Mansap» ortalyǵy basshysy Salım Ataı, Almaty qalasyndaǵy Túrkııa Bas konsýly Enver Mýderrısolý, túrik fırmalary jáne mekeme ókilderi, jastar qatysty.
«Mansap» ortalyǵynyń basshysy Salım Ataı 34 jyl buryn alǵash ret qazaq jastarymen kezdeskenin eske aldy.
«Sonaý 1990 jyldary stýdentter muǵalimdermen birge erip kelgen. Sol kezde kámelet jasqa tolǵan jastardyń ustazdarynyń jeteginde júrgenin túsine almaı, tań qalǵanymyz bar. Búgin stýdentterdiń bolashaǵyn ózderi boljap, aldaǵy josparlaryn jasaýǵa talpynystary joǵary ekenin ańǵaryp otyrmyn. Olardyń boıyndaǵy talap-tilekteriniń erkin bolýy halyqaralyq deńgeıge shyǵýǵa daıyn ekenin kórsetedi» dedi.
Almaty qalasyndaǵy Túrkııa Bas konsýly Enver Mýderrısolý is-sharaǵa kelgen meımandar men jastarǵa rızashylyǵyn bildirdi.
«Jyl saıyn ár túrli elderde uıymdastyrylatyn TalentforBiz mansaptyq jármeńkesi álemniń ár túkpirinen kelgen talantty jastardy halyqaralyq arenada jumys isteıtin túrik kompanııalarynyń mansaptyq múmkindikteri týraly aqparattandyrý maqsatynda ótkiziledi. Bul bizdiń kompanııalar úshin de, jastar úshin de jetistikke jetýge septigin tıgizedi», dedi.
Onyń sózinshe, sharaǵa kelgen jastar ózderin qyzyqtyrǵan saýaldarǵa jaýap alyp, túriktiń tanymal kompanııalarynyń ókilderimen suhbattasý múmkindigine ıe bolyp otyr. Budan basqa, kompanııa ókilderi kelýshilermen túrli prezentasııalar, aqparattyq sessııalar jáne kirispe kezdesýler ótkizip, óz kózqarastarymen bólisedi. Eger kompanııa talaby men jastardyń ótinishi bir jerden shyqsa, jumysqa ornalasýǵa jáne taǵylymdamadan ótýge ótinimder qabyldanady.
«Osyǵan oraı men is-sharada óte joǵary brend qundylyǵymen usynylǵan qurmetti kompanııa ókilderine jáne elimizdiń ósýine, damýyna jáne órkendeýine eleýli úles qosyp kele jatqan barlyq isker adamdarymyzǵa alǵysymdy bildirgim keledi. Biz qazirdiń ózinde barlyq salalarda, ásirese bilim berý, saýda jáne ekonomıka salalarynda berik ornyqqan baılanystarymyzdy odan ári nyǵaıtylǵan strategııalyq seriktesimiz baýyrlas Qazaqstanmen baılanystyramyz, osylaısha eki el arasyndaǵy yntymaqtastyq nyǵaıa túsedi», dedi elshi.
Onyń aıtýynsha, ekonomıkalyq salada eki eldiń saýda kólemi 1992 jyly nebári 100 mıllıon dollardy qurady. Byltyr jyl sońyna qaraı bul soma 6 mıllıard dollardan asqan. Qos memlekettiń ortaq maqsaty – ekijaqty saýda kólemin qysqa merzimde 10 mıllıard dollarǵa deıin arttyrý. Saýda men ınvestısııanyń mańyzdy bóligi Almaty qalasy men oblysyna tıesili. Túrik azamattarynyń basym kópshiligi Almatyda turady.
«Prezıdentimizdiń basshylyǵymen biz ekijaqty qarym-qatynastarymyzdy odan ári nyǵaıtýdyń joldaryn izdep kelemiz. Onyń mysaly, búgingi is-sharadaǵydaı tehnologııamen qamtamasyz etilgen múmkindikterdi paıdalanýǵa jol ashý. Sondyqtan yntymaqtastyqtyń mańyzdy múmkindigi retinde kórmemizdiń jemisti jáne tabysty bolýyn tileımin», dep túıindedi sózin Enver Mýderrısolý.
Aıta ketý kerek, qos eldiń yntymaqtastyǵyn arttyrýǵa baǵyttalǵan kórmege Turkish Airlines, Turkish Aerospace Industries, Aselsan, Havelsan, Halk Bankası, Türk Telekom sııaqty túrli salalardaǵy jetekshi túrik kompanııalary, sondaı-aq Qazaqstanda jumys isteıtin Abdi İbrahim, Esan Eczacıbaşı, Ziraat Bankası jáne Pro Yapı sııaqty kompanııalar qatysty.
Kompanııa ókilderi men Qazaqstannyń jastary Túrkııanyń kadr resýrstaryn qurý jáne nyǵaıtý salasyndaǵy tájirıbesi men jetistikteri týraly egjeı-tegjeıli maǵlumat alyp, qos eldegi perspektıvaly jastardyń mansabyn damytýǵa aıtarlyqtaı úles qosyp keledi.