Sońǵy kezderi Sony, Disney jáne Pixar sııaqty iri stýdııalar fılmderin qazaq tilinde dýblıajdap shyǵaryp, qazaq dýblıajynyń óristeýine jol ashyp otyr. Bul úrdis tilimizdiń álemdik deńgeıde nasıhattalýyna tyń serpin beredi. Bul týraly Mádenıet jáne aqparat mınıstri Aıda Balaeva Facebook áleýmettik jelisindegi paraqshasynda jazdy, dep habarlaıdy Egemen.kz.
Mınıstrdiń aıtýynsha Gollıvýdtyq stýdııalardyń qazaq tilinde dýblıaj jasaýdy qoldaýy mádenı dıalogty damytýǵa yqpal etip qana qoımaı, tilimizdiń nasıhattalýyna múmkindik beredi. Jaqynda jaryq kórgen «Venom: Sońǵy bı» fılmi qazaq tilinde kórermen nazaryna usynylyp, osy úrdistiń jarqyn mysalyna aınaldy.
«Búgin biz halyqaralyq kınoındýstrııadaǵy mańyzdy tendensııany baıqap, baǵamdap otyrmyz. Álemdik kompanııalardyń qazaq tilindegi dýblıaj jasaýǵa ketetin shyǵyndardy óz moınyna alýy – qazaq tilin álemdik mádenı alýandyqtyń mańyzdy elementi retinde moıyndaýynyń belgisi. Qazirgi kezde tek qazaq tilindegi dýblıajdy fılmder shyǵarý ǵana emes, sonymen qatar, qazaq tiliniń damýyna úles qosatyn bastamalardy da qoldaý óte mańyzdy. Dýblıaj - jaı ǵana aýdarma emes, álemdik obrazdar men sıýjetterdi qazaqtildi aýdıtorııaǵa jaqyndatatyn, zor jaýapkershilikti talap eteten erekshe óner. Osyndaı jemisti jumys atqaryp júrgen seriktesterimizge alǵys aıtamyn. Kıno – bul ónerdiń qaıtalanbas tili jáne álemdik keıipkerler qazaq tilinde sóılegen kezde, bizdiń mádenı qundylyqtarymyz ben álemdik mádenı muranyń arasynda berik baılanys qalyptasary sózsiz», dedi mınıstr.