Kórshi elder fotoshejiresi

Kórmege úsh memlekettiń tabıǵı erekshelikteri men mádenı baılyǵyn kór­setetin 600 sýret qoıylǵan. Qas-qa­ǵym sátti máńgilik tarıhqa aınal­dyrǵan ká­sibı fotosheberler ár eldiń jar­qyn jetistikterin, aıtýly tabystaryn óz ju­mys­tary arqyly kórsetýge kúsh salǵan.

Mádenı shara qonaqtarynyń qata­rynda kórshiles elderdiń tanymal sýret­shileri men ónertanýshylary boı kór­setti. Olardyń arasynda Kásibı fotograftar lıgasynyń prezıdenti Ksenııa Lebed, «Sıfrlyq fotosýretshiler men fotograftar» odaǵy qoǵamdyq qorynyń prezı­denti Dare Dýnıch te bar. Reseı Federasııasynyń Almaty qalasyndaǵy konsýly Natalıa Sorokına kórermen­di kórmeniń ashylýymen quttyq­tap: «Fotoóner salasyndaǵy mádenı kásibı qaýymdastyqtar ara­syndaǵy ózara yntymaqtastyq pen baılanys­ty kúsheıtý, sondaı-aq kelýshilerdi úsh eldiń mádenıetimen, dástúrimen, qazirgi damýymen tanystyrý – fotokórmeniń basty maqsaty. Biz bul kórme mádenı baılanystardy nyǵaıtýdaǵy jáne elder arasyndaǵy yntymaqtastyq úshin jańa múmkindik jasaýdaǵy mańyzdy qadam bolatynyna senimdimiz», dep atap ótti.

Kórshiles elderdi mádenı ynty­maq­tas­tyqqa uıystyrǵan óner jármeńkesin Memlekettik Ortalyq mýzeıi, Qytaıdyń ǵylymı-tanymdyq fılmder men tele­baǵdarlamalar qaýymdastyǵy, «Foto jáne vıdeotúsirilim» jýrnaly, Reseıdiń kásibı fotograftar lıgasy birlese uıymdastyrǵan. Kórme fotoóner men vıdeotúsirilimniń zamanaýı jetistikteri týraly syr shertip, sala mamandaryn kásibı damýǵa shaqyrady. Sebebi Orta Azııa elderinde kásibı fotosheberlerdi biriktiretin ortaq alań kóp emes.

«Fotograftar men sıfrlyq foto­sýret­shiler odaǵy» QB prezıdenti Darıa Dýnıch: «Biz áriptesterimizge Eýropalyq dıp­­lomdar men biliktilik alýǵa kómek­tese­miz, kórmeler, dárister uıym­das­tyramyz, saý­da kórmelerine qaty­samyz. Lıganyń bas­ty mindeti – joǵary sapaly sýretterdi nası­hattaý. Birlestik ónerge jáne jalpy foto mádenıettiń damýyna uqsas kózqa­ras­­tary bar kásibı fotograftar men foto­­áýes­qoı­lar múddesin bildiredi» dep má­lim­dedi.

«El men eldi, ult pen ultty bir-biri­ne jaqyndastyra túsetin qýatty kúsh – máde­nı baılanystar. Memlekettik orta­lyq mýzeı elimizdiń jetekshi mádenı-bilim berý orta­lyǵy retinde tarıhı mura­ny, mádenı jáne bilim berý bas­ta­malaryn damytýdy kózdeıdi. Fotomádenıet taqyrybynda kezdesýler uıymdastyrý jáne konferensııa­lar ótkizý, fotografııalyq murany saqtaý arqyly elimizde jáne sol sııaqty shetelde Qazaqstannyń oń ımıdjin qalyptastyrý mańyzdy mindet. Shetel­dik áriptestermen birlese otyryp, memleketter arasyn­daǵy mádenı baılanys­tardy nyǵaıtýǵa baǵyttalǵan joba­lardy júzege asyra beremiz», deıdi Mem­le­kettik ortalyq mýzeı dırektory Rashıda Harıpova.

ALMATY