Jetisý aýyldaryn jandandyrýǵa eń aldymen qalypty jol, sodan soń jańa áleýmettik nysandar qajet. Júıeli jumys bar jerde halyq turaqtaıdy. Osy turǵyda oblys ákimi Beıbit Isabaev aýyldarǵa kóbirek kóńil bólip keledi. Aıtalyq, shalǵaıdaǵy Kópbirlik aýylyna otyz jyldan soń jańa jol salyndy. Talaı jyl halyqty qınap kelgen aýyzsý máselesi de sheshildi. Kóp uzamaı munda medısınalyq keshen men mádenıet úıi salynbaq.
Buryn bul eldi mekenderge jetkilikti kóńil bólinbegeni belgili. Sebebi halyq Almaty mańaıynda tyǵyz qonystanǵandyqtan, shalǵaıdaǵy aýyldardaǵy áleýmettik nysandar eski kúıinde qala berdi. Oblys ortalyǵyna qatynaıtyn úlken jol da jóndelmedi. Osy olqylyqtyń ornyn toltyrý maqsatynda alystaǵy aýyldarǵa qajetti ınfraqurylym tartylyp, medısınalyq, sporttyq, mádenı nysandar boı kóterip jatyr. Oǵan dálel – Qyzylbalyq aýyldyq okrýgine qarasty Kópbirlik aýylyndaǵy is-sharalar. «Úshtóbe – Almaly – Kópbirlik» avtomobıl jolynyń jalpy uzyndyǵy 176 km quraıdy. Sonyń keteýi ketken 137 shaqyrymy tolyq jóndeldi. Bıyl joldyń 78,5 shaqyrymy ashyldy. Al qalǵan bóligi qanaǵattanarlyq jaǵdaıda.
«Byltyr uzyndyǵy 30 shaqyrym ýchaske jóndeldi. Búginde avtotrassanyń 90–147 shaqyrym aralyǵyndaǵy ýchaskesine asfalt tóseldi. Qazirgi kezde abattandyrý jumysy júrip jatyr. Jol jıegi nyǵaıtylyp, belgiler ornatylady. Jumys 10 qarashaǵa deıin bitedi. Jóndeý jumysy trassanyń ekinshi, úshinshi ýchaskelerinde de aıaqtaldy. Bul nysandar paıdalanýǵa berildi. Sóıtip «Úshtóbe – Almaly – Kópbirlik» jolynyń barlyq atalǵan ýchaskelerine asfalt tóseldi. Jobanyń quny 4,9 mlrd teńgeden asady. Jol úshinshi sanatty, júrý bóliginiń eni 7 metr», dedi B.Isabaev.
Jalpy, Kópbirlikten Almaly aýylyna deıingi uzyndyǵy 28 km jol ýchaskesine 2021 jyly ortasha jóndeý júrgizilgen. Joldyń qalǵan bóliginiń qurylysy tórt bólikke bólingen. Oblys ákimi baspasóz qyzmetiniń málimetinshe, kelesi jyly «Úshtóbe – Almaly – Kópbirlik» jolynyń 145-ýchaskesindegi Almaly kópiri jańǵyrtylady. О́ńirde jaqsy, qanaǵattanarlyq jaǵdaıdaǵy oblystyq mańyzy bar joldardyń úlesi jyldyń sońyna qaraı 94%-ǵa jetedi.
Turǵyndar aýyzsý máselesiniń sheshilgenine de dán rıza. Aýylda ortalyqtandyrylǵan sý qubyry bolǵanymen, keıingi jyldary turǵyndar tuzdy sý ishýge májbúr edi. 2010 jyly aýylda sýmen jabdyqtaý júıesi qaıta jańǵyrtylǵan, jańa jeliler salynyp, tereńdigi 100 metrden asatyn uńǵyma qazylǵan. Sol kezde tushylandyrý qondyrǵysy ornatylyp, ysyrmalary aýystyryldy. Qabyldanǵan is-sharalarǵa qaramastan, keıingi jyldary sýdyń tuzdylyǵy lıtrine 5,9 gramnan 8 gramǵa deıin ósken. Sóıtip, bul aýyl halqyn mazalaǵan máselege aınaldy. Osyǵan baılanysty, oblys ákimi Beıbit Isabaevtyń tapsyrmasyna sáıkes bıýdjetten qarajat bólinip, máseleni sheshýge qajetti sharalar qabyldandy. Atap aıtqanda, 2 km jelige qaıta jańǵyrtý júrgizilip, jańa sý munarasy turǵyzyldy. Oǵan qosa tuzdaný deńgeıi lıtrine tipti 12 gramǵa jetken kúnde de sýdy tushylandyrýǵa qýaty jetetin jańartylǵan tushylandyrý qondyrǵysy ornatyldy.
«Aýylda 179 aýla bar, sonyń 168-i ortalyq sýmen jabdyqtaý júıesine qosylǵan. Aýylda turatyn halyq sany 900-den asady. Aýyzsý – tirshiliktiń negizgi kózi, densaýlyqtyń kepili. Sondyqtan onyń sapasynyń jaqsy bolǵany mańyzdy. Bizde birneshe jyldan beri aýyzsý sapasy nashar edi. Bıyl bul másele sheshimin tapty, halyq rıza. Aýylymyzǵa budan bylaı da kóńil bólinedi dep senemiz», deıdi aýyl turǵyny Zámzágúl Nesipbaeva.
Turǵyndardyń tilegine oraı kóp uzamaı Kópbirlik aýylynda kitaphanasy bar mádenıet úıi salynady. Muny oblys ákimi Qaratal aýdanyna jasaǵan jumys sapary barysyndaǵy aýyl turǵyndarymen kezdesýinde aıtty. Aýyldyqtardyń ótinishi negizinde óńir basshysy tıisti laýazymdy tulǵalarǵa atalǵan nysannyń qurylysyna daıyndyq jumystaryn bastaý týraly tapsyrma berdi.
«Kópbirlik – oblystyń eń shalǵaıdaǵy aýylynyń biri. Memleket basshysynyń tapsyrmasyna sáıkes oblys ortalyǵyna jaqyn eldi mekenderdi ǵana emes, alys jatqan aýyldardy abattandyrý men damytýǵa erekshe kóńil bólemiz. Halyqtyń ómir súrý sapasyn jaqsartýǵa eń aldymen sapaly aýyzsý, jol, jaryq, áleýmettik nysandar kerek. Turǵyndar turmystyń jaqsarǵanyn sóz júzinde emes, is júzinde sezinýge tıis. Aýylǵa keletin joldy jóndep bitirdik, aýyzsýdyń sapasyn jaqsarttyq, deneshynyqtyrý-saýyqtyrý keshenin, aýyl ákimdiginiń keńsesin salyp berdik. Endi sizderdiń ótinishterińizge sáıkes kitaphanasy bar mádenıet úıi turǵyzylady. Eki aýyldyq okrýgke ortaq órt sóndirý deposyn quryp, qajetti tehnıkamen qamtamasyz etemiz. Sol sııaqty kóshelerdi jóndeýge, jaryqtandyrýǵa nazar aýdarylady», dedi B.Isabaev.
Odan bólek, turǵyndar tarapynan aýyl balalaryn túrli jarysqa aparýǵa shaǵyn avtobýs kerektigi aıtyldy. Sonymen qatar Balqash kóliniń jaǵalaýyna aparatyn 2,5 shaqyrymdyq joldyń máselesi de kóterildi. Aýyldyqtardyń aıtýynsha, ásirese jańbyrly kúnderi jaǵalaýǵa jetý qıyndyq týdyrady. Qos usynys ta kóp uzamaı sheshiletin bolady.
Aıta keteıik, Kópbirlik aýyly men Qaraqum aýyly Qyzylbalyq aýyldyq okrýgine qaraıdy. Onyń mańaıynda 4 eldi mekendi qamtıtyn Baıshegir aýyldyq okrýgi bar. Oǵan Almaly, Dóńsheı, Aqıyq, Aqjar aýyldary kiredi. Sonyń ishindegi halqy kóp Almaly aýylynda úsh birdeı áleýmettik nysan salynbaq. Keler jyly mádenıet úıiniń, blokty-modýldi dárigerlik ambýlatorııanyń, sport kesheniniń qurylys jumystary bastalady.
Jetisý oblysy