Búgin elorda tórinde sambo kúresinen álem chempıonaty túńligin túredi. 50 jyldan beri turaqty uıymdastyrylyp kele jatqan jahandyq dodanyń jańalyǵy da joq emes. Astanada ótetin álem chempıonatynda áıelder tuńǵysh ret jaýyngerlik sambodan beldesýge túsedi. Odan bólek, zaǵıp jandar da alǵash ret álemdik alamannyń medali úshin kúresedi.
Olımpııa oıyndarynyń baǵdarlamasyna enbegenimen, sambo kúresine qyzyǵýshylardyń qatary qalyń. «Sambo federasııasy birneshe jyldan beri aýqymdy jarystardyń uıymdastyrylýyna, sportshylardyń álemdik dodalarǵa qatysýyna ekpin berip keledi. Búginde elimizde 43 myńnan astam adam osy kúres túrimen kásibı shuǵyldanady», deıdi Sambo federasııasynyń bas hatshysy Ernazar Beksultanov.
Sambo kúresinen 1973 jyly Iran elinde tuńǵysh ret álem chempıonaty jalaýyn kóterdi. Arada ótken 50 jyldyń ishinde 46 ret álemdik alamanda jalaýymyz jelbiredi. «Jyl saıynǵy el chempıonatynan bólek, 2022 jyly Aqtaýda Azııa kýbogi uıymdastyryldy. Byltyr elorda tórinde Azııa chempıonaty ótti. Bıylǵy mamyr aıynda Aqtaý qalasynda Azııa jáne Okeanııa chempıonaty uıymdastyrylyp, dodaǵa 25 elden 500-den astam balýan qatysty. Endi álem chempıonatyn joǵary deńgeıde atqarýǵa barymyzdy salamyz», dedi E.Beksultanov. Bas hatshy kelesi jyldan bastap klýbtyq júıeni jetildirip, jastar, jasóspirimder, jetkinshekter arasynda sambo kúresimen shuǵyldanýshylardyń qataryn arttyrýdy kózdep otyrǵandaryn aıtty.
Sambo federasııasynyń birinshi vıse-prezıdenti Manarbek Bısekenov 19 jyldan keıin elimizge aınalyp kelgen jahandyq dodanyń mańyzy joǵary ekenin málim etti. «Astanada jalaýy jelbireıtin álem chempıonatynda 85 elden 600-den astam balýan qatysýǵa ótinishin joldady. Balýandarmen qatar bapkerler, dárigerler bastaǵan 150-den asa maman keledi», dedi M.Bısekenov.
Álemdik dodanyń jalpy júlde qory – 311 myń AQSh dollary. Chempıon atanǵan balýan – 4 myń, kúmis júldeger – 3 myń, qola medal enshilegen balýandar 2 myń dollar syıaqy alady. Zaǵıp jandar úsh salmaq dárejesinde synǵa túsedi. Top jarǵan, júldeger atanǵan balýanǵa 1000 AQSh dollary mólsherinde syıaqy beriledi.
Ulttyq quramanyń bas bapkeri Birjan Imahanov álem chempıonatynda beldesýge túsetin balýandar 24 qazannan bastap qorytyndy oqý-jattyǵý jıynyn Astana qalasynda ótkizgenin aıta kelip: «Álem chempıonatyna elimizden 28 balýan qatysady. Erler dodasynda álem chempıony Serik Nurbol, áıelder synynda ǵalamdyq dodada top jarǵan Araılym Ábenova, Gúldana Álmuhanbetovaǵa erekshe senim artamyz», dedi. Bas bapker elimizde ótetin chempıonattan 2 altyn medal oljalaý mindettemesi júktelgenin de atap ótti.
Kelesi jyly Qytaıda Dúnıejúzilik jekpe-jek oıyndary jalaýyn jelbiretedi. Osynaý aıtýly dodaǵa qatysatyn balýandardyń tizimi álem chempıonatyndaǵy nátıjege oraı túzilmek.