Jetisýlyq kásipker memlekettik grant arqyly ońaltý ortalyǵyna arnalǵan qural-jabdyq satyp alǵan. Endi biri erekshe bilim berýdi qajet etetin balalarǵa arnalǵan túzetý ortalyǵyn ashqan. Ekeýi de 5 mln teńgelik qaıtarymsyz qarjy utyp alyp, bızneske táýekel etti.
Bıyl 6 aıda shaǵyn jáne orta bıznes (ShOB) salasynda jumys isteıtin adamdar sany byltyrmen salystyrǵanda 95,2%-ǵa ósken. Bul óte joǵary kórsetkish, qazir aýyl turǵyndary memleketten grant alyp, kásibin bastap, 2-3 adamdy jumyspen qamtyp otyr. Al ońaltý ortalyǵyna bólingen qarjy áýeli ulttyń densaýlyǵyn jaqsartýda úlken kómek bolmaq. Muny «Balajan» jekemenshik túzetý ortalyǵynyń dırektory Laýra Dárkenbaevamen tildeskende ańǵardyq.
«Eki jyl buryn 2021–2025 jyldarǵa arnalǵan kásipkerlikti damytý jónindegi Ulttyq joba sheńberinde grant aldym. Sonyń nátıjesinde balalarǵa arnalǵan túzetý ortalyǵyna kerekti túrli trenajer men medısınalyq apparatýralar satyp aldyq. Ortalyq ashý týraly oılaǵanymda, birinshi kezekte adamdarǵa paıdam tıse degen oı boldy. Sondyqtan balalarǵa arnalǵan túzetý ortalyǵyn ashý týraly sheshim qabyldadym. Sóıtip, bıyl qyrkúıek aıynda Taldyqorǵanda túzetý ortalyǵymyz, damytý men qosymsha ortalyqtarymyz jumysyn bastady. Qyzmetimizdiń maqsaty – psıhofızıkalyq damýy jaǵynan buzylysy bar balalarǵa psıhologııalyq-pedagogıkalyq keshendi kómek kórsetý. Balanyń belsendi-ıntellektýaldy, sóıleý, emosıonaldy mártebesin ózgertýge kómektesemiz. Bar balaǵa teńdeı jaǵdaı jasaı otyryp, olardy qatarlastarymen aralasýǵa, óz-ózine qyzmet kórsetýge úıretemiz», deıdi L.Dárkenbaeva.
Onyń aıtýynsha, ortalyqta balalarmen júrgiziletin korreksııaly-damytý jumystaryn pedagog-psıholog, defektolog muǵalim, logoped muǵalim, sýret muǵalimi, emdik dene shynyqtyrý nusqaýshysy, mýzykalyq jetekshi sııaqty dıplomy bar bilikti mamandar atqarady. Túzetý jumystarynyń uzaqtyǵy ár balaǵa jeke belgilenip, jeke oqý jospary jasalady. Ortalyqta 15 adam jumys isteıdi.
Kómekti qajet etetin adamdarǵa memlekettik grantpen ashylǵan jekemenshik ońaltý ortalyǵy da úlken yqpal etip jatyr. О́tken jyly 500-ge jýyq adam osynda ońaltýdan ótse, jyl basynan beri olardyń sany 700-ge jetken. Solardyń ishinde Shyǵys Qazaqstan men Almaty óńirlerinen kelgen emdelýshiler de bar. Al ortalyq qyzmetkerleriniń sany 2 ese, ıaǵnı 16-dan 32-ge artty.
«2022 jyldyń sońynda «Bastaý Bıznes» jelisimen oqýdan óttim, keıin kásipkerlikti damytý jónindegi ulttyq joba aıasynda óz jobamdy tanystyryp, 5 mln teńge grant utyp aldym. Osy aqshaǵa reseılik «Levıtas» arnaıy qurylǵysyn, Polshadan júrý ımıtatoryn satyp aldym. Insýlt, ınfarkt alǵan, jol apatyna túsken adamdar Memlekettik áleýmettik medısınalyq saqtandyrý (MÁMS) júıesimen qazir bizdiń ortalyqta ońaltýdyń tolyq kýrsynan ótip jatyr. Zamanaýı ozyq dıagnostıkalyq quraldarymyz bar. MÁMS aıasynda tegin ońaltýmen qatar, kommersııalyq negizde de qyzmet kórsetemiz. Bul rette bizdiń ortalyǵymyz – Taldyqorǵanda táýlik boıy qyzmet kórsetetin jalǵyz ortalyq», deıdi «Meıirim» ońaltý ortalyǵynyń dırektory Erasyl Edilhanuly.
Azamattar densaýlyq jaǵdaıyna qaraı stasıonarda 10-14 kún kóleminde emdeledi. Ortalyqtyń kúndelikti 60 adam qabyldaýǵa qaýqary bar.
Kásipker aldaǵy ýaqytta táýligine 24 saǵat boıy úzdiksiz kútimdi qajet etetin aýyr jaǵdaıdaǵy naýqastarǵa pallıatıvti tósek satyp alý jospary bar ekenin aıtady. Al oǵan memleket tarapynan qoldaý mańyzdy. Búginde oblys aýmaǵynda 7 ońaltý ortalyǵy jumys isteıdi. Sonyń 5-eýi – memlekettik bolsa, qalǵany jekemenshik sanalady.
Bıznesti damytýdyń 2022–2023 jyldarǵa arnalǵan memlekettik qoldaý sharalary aıasynda Jetisý oblysynda jalpy somasy 680 mln teńgege 142 joba maquldandy. Áleýmettik kásipkerlik pen «Bir aýyl – bir ónim» jobasynyń jeńimpazdaryna memlekettik grant berý qarastyrylǵan. Osy maqsattarǵa jergilikti bıýdjetten 170,0 mln teńge bólindi. Konkýrs bıyl qarashada ótkiziledi dep josparlanǵan.
Jalpy, óńirde 6 aıda shaǵyn jáne orta bızneste jumys isteıtin adam sany 104,7 myńdy qurady. ShOB-tyń jalpy óńirlik ónimdegi úlesi – 33,2%. Keler jyly osy salaǵa bólinetin qarjy kólemi artady.
Jetisý oblysy