Úkimet basshysy Oljas Bektenovtiń tóraǵalyǵymen ótken Úkimet otyrysynda densaýlyq saqtaý mınıstri Aqmaral Álnazarova halyqty dári-dármekpen qamtamasyz etý boıynsha qabyldanyp jatqan sharalar týraly baıandady, dep habarlaıdy Egemen.kz.
Aqmaral Álnazarovanyń málimetinshe, bıyl ambýlatorııalyq jáne stasıonarlyq deńgeıde dári-dármekpen qamtamasyz etýge respýblıkalyq bıýdjetten 474 mlrd teńge, al jergilikti bıýdjetten 26,7 mlrd teńge qarajat jumsalǵan.
Sonymen qatar ambýlatorııalyq deńgeıde 251 mlrd teńgege 3,5 mln pasıent 120 nozologııa boıynsha tegin dári-dármekpen qamtamasyz etilgeni habarlandy.
Aýyl turǵyndarynyń dárilik zattarǵa qol jetkizýin qamtamasyz etý úshin medısınalyq uıymdar bazasynda 172 dárihana jáne 694 jeke dárihana, sondaı-aq 15 jyljymaly dárihana pýnktteri uıymdastyrylǵan.
«Pasıentterdiń stasıonarlyq deńgeıdegi dári-dármekpen qamtamasyz etilýi Qazaqstandyq ulttyq dárilik formýlıarǵa sáıkes ortalyqtandyrylǵan jáne derbes satyp alý arqyly júzege asyrylady. Bıyl Biryńǵaı dıstrıbıýtordyń 2025 jylǵa arnalǵan satyp alý naýqany bir aı buryn bastaldy, bul «SQ-Farmasııa» JShS qoımalaryna dárilik zattardy 2025 jylǵy 1 qańtarǵa deıin jetkizýdi qamtamasyz etýge múmkindik beredi», dedi Densaýlyq saqtaý mınıstri.