«High Industrial Lubricants & Liquids (HILL) Corporation» JShS qozǵaltqysh, týrbına, transmıssııa, gıdravlıka maılaryn, jaqpamaılar óndiredi. Sondaı-aq qoldanylǵan maılardy qaıta óńdeýmen aınalysady. О́ndiris sehtary joǵary tehnologııaly qondyrǵylarmen jabdyqtalǵan. Avtomatty aralastyrý, qospasy bar bóshkelerdi bosatý, plastık ydystar shyǵarý, ónimdi quıý jelisi sekildi qondyrǵylarmen qamtamasyz etilgen. Búginde zaýytta 300 adam jumys isteıdi. Kásiporyn «Ońtústik» ındýstrııalyq aımaǵynda ornalasqan.
2010 jyly qurylǵan «HILL» Corporation JShS – Shymkent qalasynyń eń iri salyq tóleýshileriniń biri. «HILL» qozǵaltqysh maılaryn eski jáne jańa kólikterge, álemdik avtoóndirýshilerdiń barlyq modeldegi jeńil kólikterine qoldanýǵa bolady. Transmıssııa maılary avtomatty jáne mehanıkalyq berilis qoraby men basqa da transmıssııa túrlerine jaraıdy. «HILL» Corporation JShS-nyń motor maılary júk tasıtyn avtomobılderge, avtobýstarǵa, aýyl sharýashylyǵy kólikteri men arnaıy tehnıkalarǵa, temirjol, sýda júretin kólikterge, áýe kemelerine arnalǵan. Zaýyt óndiretin ónerkásiptik maılar gıdravlıkalyq, redýktorlyq, týrbınalyq, kompressorlyq qondyrǵylar úshin kerek.
О́nimniń 75 paıyzy óz elimizde tutynylsa, qalǵan 25 paıyzy TMD memleketteriniń naryǵyna eksporttalady. Kásiporyn jylyna 70 myń tonna qozǵaltqysh maıyn, 28 myń tonna óńdelgen maı, 1 500 tonna jaqpamaı óndirýge qaýqarly. Kompanııa maılardy ASTM («American Society for Testing and Materials») standartyna sáıkes «Infineum», «Lubrizol», «Chevron Oronite», «Afton» sekildi álemdik óndirýshilerdiń bazalyq maılary men qospalaryn amerıkalyq «FMC Technologies» qondyrǵysynda blendıng, ıaǵnı bir-birine aralastyrý arqyly shyǵarady. Zaýytta «Fastroil», «HILL», «HILL Grease» degen saýda belgilerimen quramy, qurylymy bólek 400-ge jýyq maı óndiriledi. «Fastroil FF» dep atalatyn sońǵy úlgidegi maı óndirisi qolǵa alynǵan. «HILL Corporation» maılaý materıaldary «General Electric», «MAN», «Cummins», «CAT», «MWM», «Jenbacher», «ZF», «MAG», «Deutz», «MTU», «Avtovaz», «Kamaz», «VOLVO», «Mack», «Renault», «Mercedes-Benz» sekildi álemdik óndirýshiler tarapynan arnaıy ruqsat qaǵazben, sondaı-aq sertıfıkatpen rastalǵan. О́ndiris orny «Fluid Solutions» nemis tehnologııasymen qoldanylǵan eski maılaý materıaldaryn óńdep, odan I toptaǵy bazalyq maılar jasap shyǵarady.
Kompanııa elimizdiń ekologııalyq talaptaryna jaýap beretin zamanaýı zaýyt qura bildi. Sonymen birge qorshaǵan ortaǵa zııandy qaldyqtardy azaıtý maqsatyndaǵy «Jasyl» ekonomıka saıasatyn júrgizýge de atsalysyp jatyr. «HILL Corporation» JShS dırektory Azamat Jolshybekovtiń aıtýynsha, «Jasyl Eýrazııa» baıqaýynda qaldyqtardy tıimdi joıý atalymy boıynsha 2-oryndy jeńip aldy. Sondaı-aq «ERG Supply Award 2023», «ERG Sustainability Award» konkýrstarynda «Eń myqty óndirýshi» marapatyna ıe boldy. Odan bólek, osy jyldyń tamyz aıynda kompanııaǵa «Green company» ataǵy berilip, «Jasyl sertıfıkat» marapatynyń ıesi atandy.
Shymkent qalasynyń kásipkerlik jáne ındýstrııalyq-ınnovasııalyq damý basqarmasynyń málimetine sáıkes, bıylǵy 9 aıda óńdeý ónerkásibinde 712 mlrd teńgeniń ónimi shyǵarylǵan. 43,3 myń tonna munaı-gaz-hımııa ónimi óndirilgen. 2019 jylmen salystyrǵanda negizgi kapıtalǵa salynǵan ınvestısııa 3,2 ese artqan. Bıyl josparǵa sáıkes megapolıste dárilik zattar men medısınalyq buıymdar shyǵaratyn jańa kásiporyn paıda bolady. Ekonomıkadaǵy orta kásipkerlik úlesi 6 aıda 9,3 paıyzǵa jetti. 1 000 kásipkerlik nysan memleketten qoldaý tapqan. Sıfrlyq tehnologııalardy paıdalanatyn óńdeýshi kásiporyndar úlesi bıylǵy josparda 13,3 paıyz bolyp belgilengen. Megapolıste 19 iri, 42 orta, 876 shaǵyn óndiris orny bar. Toǵyz aıda 810,6 mlrd teńgeniń ónimi óndirildi. Byltyrǵy kezben salystyrǵanda kórsetkish 2 paıyzǵa artqan. О́ńdeý ónerkásibinde metall buıymy, hımııa, farmasevtıka, rezına, plastmassa, tamaq, sýsyndar, mashına jasaý men munaı óńdeý ónimderiniń kólemi jyldan-jylǵa ósip keledi.
Shaharda myń gektardan astam aýmaqty quratyn 7 ónerkásiptik aımaq bar. Onda 601,7 mlrd teńgege 426 joba iske asyrylyp jatyr. Búginge deıin 225 mlrd teńgege 293 joba naqty júzege asyryldy. Nátıjesinde, 8,5 myń adam jumyspen qamtyldy.