Qazaqstan Respýblıkasy Ortalyq memlekettik kıno, fotoqujattar jáne dybys jazbalary muraǵatynyń delegasııasy Mońǵolııa Ulttyq muraǵatynda ǵylymı-zertteý jumystary barysynda Qazaqstanǵa qatysty qundy materıaldardy anyqtady, dep habarlaıdy Egemen.kz Mádenıet jáne aqparat mınıstrligine silteme jasap.
«Arhıv – 2025» keshendi jospary aıasynda shet el arhıvterinen Qazaqstannyń tarıhy men mádenıetine qatysty tarıhı qujat jınaqtaý maqsatynda QR Ortalyq memlekettik kınofotoqujattar men dybys jazbalar arhıviniń delegasııasy Mońǵolııanyń Ulan-Batyr qalasyna issaparmen bardy.
Ǵylymı-zertteý jumystary barysynda Mońǵolııa Ulttyq arhıvinen Qazaqstanǵa qatysty qujattar anyqtalyp, 90 fotoqujat jáne jalpy uzaqtyǵy 92 mınýttyq kınoqujattyń kóshirmesi alynǵan.
Kınoqujatta Baıan-О́lgeı aımaǵynyń on jáne jıyrma jyldyǵyna arnalǵan beınequjattary, otandyq delegasııanyń jergilikti qazaqtardyń tynys-tirshiligimen tanysýy týraly derekter bar. Al fotoqujattarda Baıan-О́lgeı aımaǵyndaǵy qazaq halqynyń turmysy, jergilikti teatr ártisteriniń qoıylymdary, ár jyldary Mońǵolııa eline saparlaǵan Qazaqstan azamattary beınelengen.