Otbasy bank turaqty damý salasyndaǵy pozısııasyn Sustainable Fitch-ten ESG - «3» reıtıngin alý arqyly nyǵaıtty. Bul banktiń turaqty damý qaǵıdattaryna beıildiligin rastap, turǵyn úı qoljetimdiligi men áleýmettik osal toptardy qoldaý sııaqty áleýmettik mańyzy bar mindetterdi sheshýge qosqan úlesin aıqyndaıdy, dep habarlaıdy Egemen.kz.
Búgingi tańda elimizdiń ıpotekasyndaǵy Otbasy bank úlesi 53% quraıdy. Bank eldegi ekonomıkalyq belsendi halyqtyń 29%-dan astamyn qamtıdy. Sondaı-aq aktıvteri men menshikti kapıtaly boıynsha tórtinshi oryndaǵy bank bolyp esepteledi jáne 2024 jyldyń 1 qazanyndaǵy málimetterge sáıkes, jalpy nesıelik portfeli 3,3 trln teńgege teń. 2023 jyldyń sońynda banktiń jalpy nesıelik portfeliniń 34,4%-yn maqsatty áleýmettik áseri bar nesıeler qurasa, 2024 jyldyń qazan aıyna bul kórsetkish 38,2%-ǵa deıin ósti. Bul áleýmettik osal toptar men turmysy tómen qazaqstandyqtarǵa arnalǵan jeńildetilgen nesıeler.
2024 jyldyń 9 aıynda banktiń ónimderi arqyly 48 548 qazaqstandyq otbasy zaem alyp, jańa úılerine qonystandy.
Turǵyn úı qurylys jınaq júıesiniń qatysýshylarynyń sany 2,7 mln adamdy quraıdy. Búginde banktiń depozıttik portfeli 2,3 trln teńge. 2024 jyldyń toǵyz aıynda Otbasy bankinde 350 029 adam jańa depozıtter ashqan, bul bolashaqta eń tómen paıyzdyq mólsherlememen nesıe alyp, baspanaǵa qol jetkizý úshin jasalǵan qadam.
«ESG qaǵıdattaryna beıildilik – Otbasy bankiniń strategııalyq tańdaýy. Biz áleýmettik jaýapkershiligimizdi túsinemiz jáne turaqty damý tek bank úshin ǵana emes, qoǵam úshin de tabys kepili ekenine senimdimiz. Biz «jasyl» nesıelendirýdi damytyp, genderlik teńdik pen jas qazaqstandyqtardy qoldaýdy qolǵa aldyq. Pılottyq «jasyl» ıpoteka jobasy aıasynda 27,2 mlrd teńge somasynda nesıe berildi. «Umaı» baǵdarlamasy boıynsha qazaqstandyq áıelderdi qoldap, 3 661 azamatshany óz úıimen qamtamasyz ettik. Áıelderge arnalǵan jalpy nesıe kólemi 41,3 mlrd teńgeni qurady. Aldaǵy jyly biz bul jobalardy Azııa damý bankimen yntymaqtastyq aıasynda jalǵastyrýdy josparlap otyrmyz», dedi Otbasy bankiniń basqarma tóraǵasy Lázzat Ibragımova.
Banktiń osy jáne ózge de jobalary BUU tarapynan maquldanǵan turaqty damý maqsattaryna qol jetkizýge, kedeılikti joıýǵa, ómir súrý deńgeıin arttyrýǵa, ekonomıkalyq ósýdi kúsheıtýge, teńsizdikti azaıtýǵa, turaqty qalalar men eldimekenderdi damytýǵa yqpal etýde, turǵyn úı tapshylyǵyn azaıtyp, áleýmettik osal toptardyń ómir súrý jaǵdaıyn jaqsartýda mańyzdy ról atqarady.
Sonymen qatar, Otbasy bank qorshaǵan ortany qorǵaý, resýrstardy basqarý, ekologııalyq aksııalardy ótkizý jáne qyzmetkerlerdi turaqty damý tásilderiniń mańyzdylyǵy týraly habardar etý arqyly belsendi jumys júrgizýde.
Búginde Qazaqstan ESG taqyrybynda ekstensıvti damýdan turaqty damýǵa kóshýdiń úlgisi. ESG kún tártibin damytýdaǵy mańyzdy mysaldardyń biri - 2023 jyldyń aqpan aıynda Prezıdent jarlyǵymen Qazaqstan Respýblıkasynyń 2060 jylǵa deıingi kómirtegi beıtaraptyǵyna qol jetkizý – strategııasynyń qabyldanýy jáne klımattyń ózgerý máselelerine jahandyq jaýap retinde ulttyq úlesti jańartý.
Otbasy bank – turǵyn úı qurylys jınaq júıesin iske asyratyn jáne áleýmettik osal toptardyń turǵyn úı máselelerin sheshetin iri ári jalǵyz qazaqstandyq bank retinde ESG baǵytynda belsendi damyp jatyr. Bank ártúrli áleýmettik bastamalarǵa qatysyp, ekologııalyq jáne áleýmettik mańyzy bar jobalardy júzege asyryp keledi.