Týrızm jáne sport mınıstrligi «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasyn ázirledi, dep habarlaıdy Egemen.kz.
Zań jobasyn ázirleý barysynda birneshe mańyzdy másele men naqty statıstıkalyq derekter negizge alyndy. Qazaqstanda qazirdiń ózinde 180-nen astam sport túri damyp jatyr. Alaıda jyl saıyn tek 13 jazǵy jáne 5 qysqy Olımpıadalyq sport túrinen ǵana medal jeńip alynady. 2018 jyly elimizdiń sportshylary 370 medal jeńip alsa, 2020 jyly bul kórsetkish 105 medalǵa deıin tómendegen. Bul jaǵdaı sportshylardy daıarlaý júıesindegi bastapqy kezeńder men joǵary jetistikter sportyna deıingi aralyqtaǵy jetispeýshilikterdiń nátıjesi dep baǵalanady.
Sondaı-aq jyl saıyn balalar-jasóspirimder sport mektepteri men mektep-ınternattardyń shyǵyndary ósip keledi, onyń ishinde olımpıadalyq emes sport túrlerine jumsalatyn qarajat kólemi úlken úlesti quraıdy. 2018-2020 jyldary sporttyń barlyq túrlerin damytýǵa 646 mıllıard teńge bólingen, biraq onyń 72 paıyzy elimiz úshin basymdyǵy joq sport túrlerine jumsalǵan.
Jaǵdaıdy jaqsartý úshin Týrızm jáne sport mınıstrligi halyqaralyq tájirıbeni zerttedi. О́zbekstan, Belarýs, Ulybrıtanııa, Germanııa jáne Norvegııa elderiniń tájirıbesi zań jobasynyń negizine alyndy. Zań jobasy aıasynda joǵary jetistikter sportyna jatatyn sport túrlerin naqty shekteý usynylady.
Jańa júıe boıynsha, tek Olımpıada, Paralımpıada, Sýrdlımpııa, Azııa jáne Para Azııa oıyndary baǵdarlamasyna kiretin sport túrleri, sondaı-aq ulttyq sport túrleri joǵary jetistikter sport túrleri retinde qabyldanady. Olardyń ishinde medal alǵan sport túrleri basym sport túrlerine qosylyp, respýblıkalyq jáne jergilikti deńgeıde birinshi kezekte qarjylandyrylady. Bul sharalar elimizdiń sport salasyn tıimdi basqarýǵa jáne shekteýli resýrstardy maqsatty túrde paıdalanýǵa múmkindik beredi.
«Atalyp otyrǵan ózgeristerdi engizý arqyly biz elimizde sportty damytýǵa jańa serpin berýdi kózdep otyrmyz. Qarjylandyrýdy naqty baǵytta jáne nátıjeli sport túrlerine shoǵyrlandyrý arqyly Qazaqstannyń álemdik arenada ozyq jetistikterge jetýin qamtamasyz etemiz», dep atap ótti Týrızm jáne sport mınıstri Erbol Myrzabosynov.