Jańa jyldan bastap jeke tasymaldaýshy esebinde tirkelmegen taksı júrgizýshileri «Iаndeks», «Indraıv» sekildi platformalar arqyly tapsyrys qabyldaı almaıdy. Olar sonymen qatar medısınalyq tekseristen ótýge mindetteledi, dep habarlaıdy Egemen.kz.
Derekterge súıensek, tipti bir mezgil jolaýshy tasymaldaý úshin de aldymen tirkelý qajet. Sondaı-aq árbir júrgizýshi eńbek jáne demalys rejımin saqtaýǵa jáne medısınalyq tekserýden ótýge mindetteledi.
«Medtekseristen ótý degenge men negizi ózim qarsymyn. Jolǵa shyǵardyń aldynda árkez tekserilip otyrý qıyn ǵoı. Degenmen segiz saǵattan artyq júrmeýdi qoldaımyn. Apat sol kezde azaıady dep oılaımyn», «Bizdi tirkemeı me, mysaly oń róldi. Osyny aldyq bala-shaǵany asyraý úshin. Endi qalaı sonda bala-shaǵamyzdy asyraımyz. Oń róldi alyp tastaýyna qarsymyn», dep pikir bildirdi júrgizýshiler.
Júrgizýshiler keıbir talaptardy qaıta qaraýdy usynyp otyr. Pikirlerinshe, róli oń jaqta ornalasqan kólikterdi túbegeıli onlaın agregatorlardan alyp tastaý durys emes. Degenmen bul taksıstterge qoıylatyn jańa talap ózgermeıin dep tur.
«Kúndelikti reıs aldyndaǵy jáne reısten keıingi medısınalyq tekserýden ótýge, avtokólikti kúndelikti tehnıkalyq baıqaýdan ótkizýge, sol jaqtan basqaratyn tehnıkalyq jaramdy avtokólikterdi paıdalanýǵa, júrgizýshilerdiń eńbek jáne demalys rejımin saqtaýǵa mindetti bolady», dedi ákimshilik polısııa komıtetiniń tóraǵasy Qaısar Sultanbaev.
Komıtet ókiliniń aıtýynsha, qazir ınternet-agregatorlar qosymshalarynyń jumysyn pysyqtap jatyr. О́ıtkeni, júrgizýshini tirkep, talapqa sáıkestigin naqtylaıtyn ózderi. Tapsyrysty da solar úlestiredi. Sondyqtan talaptardyń oryndalǵan, oryndalmaǵanyna kóz jetkizýleri shart.