О́mirden ótkenimen, kóńilden óshpeıtin talanttyń biri Tabyldy Dosymovty umytýǵa bola ma? О́ıtkeni aramyzda ózi bolmasa da, bardtyq stıldegi qaıtalanbas ánderi qaldy.
Munaıly óńir jurtshylyǵy Tabyldy Dosymovtyń shyǵarmashylyǵyna arnalǵan «Samala sazdar saǵymy» atty án baıqaýyna kýá boldy. Bul baıqaýǵa Aqtóbe, Batys Qazaqstan, Mańǵystaý jáne Atyraý oblysynan 19 ónerpaz qatysty. Tórt óńirden jınalǵan ónerpazdar baıqaý shartyna sáıkes gıtaramen án shyrqady. Baıqaýdyń qorytyndy konserti Mahambet atyndaǵy akademııalyq qazaq drama teatrynda ótti. Teatr zaly kórermenge lyq toldy.
«Eliniń, ultynyń shynaıy patrıoty ekenin isimen de, ánderimen de dáleldegen Tabyldy Dosymovtyń artyna qaldyrǵan mol murasy – poezııasy men ánderi. Onyń ánderin nasıhattaıtyn izbasarlary az emes. Bolashaqta shyǵarmalaryn shyrqaıtyn jas ónerpazdar kóbeıe tústenine senemin. О́ıtkeni onyń ánderiniń astarynda ómirlik maqsat, fılosofııalyq oı bar», dedi oblys ákiminiń orynbasary Daryn Shamuratov.
Qazylar alqasynyń uıǵarýymen baıqaýdyń birinshi júldesine atyraýlyq ónerpaz Izbasar Samıǵollaev ıe boldy. Al ekinshi orynǵa Batys Qazaqstan oblysynyń ókili Zıbatolla Eshqaev pen jergilikti ánshi Orynbasar Jumahanov laıyq dep tanyldy. Úshinshi júldeni Aqtóbeden qatysqan Batyrbek Amanqulov pen mańǵystaýlyq Serikbol Jetibaev, atyraýlyq Azamat Jumaǵalıev ıelendi.
Baıqaýdyń qorytyndy konsertinde uly Abyl Aıash, Ulttyq ulan ansambliniń ánshisi Ashat Ámirǵalıev, baıqaý júldegerleri men ózge de ónerpazdar án shyrqady. Sondaı-aq Tabyldy Dosymovtyń óneri men shyǵarmashylyǵy arqaý etilgen «Samala sazdar saǵymy» kitaby tanystyryldy.
Atyraý oblysy