Ál-Farabı atyndaǵy Qazaq ulttyq ýnıversıtetiniń Farabı kitaphanasynda «Baspa isindegi zamanaýı úrdister jáne avtorlyq quqyq menedjmenti» taqyrybynda semınar ótti. Frankfýrt kitap jármeńkesiniń ókilderi halyqaralyq kitap isindegi zamanaýı jetistikter, polıgrafııadaǵy jańa tehnologııalar, kitap shyǵarý men taratý isindegi ozyq tájirıbelermen bólisti.
Ál-Farabı atyndaǵy QazUÝ Orta Azııada baspa salasyna mamandar daıarlap otyrǵan birden-bir oqý orny. Semınardyń ashylýynda QazUÝ rektory Janseıit Túımebaev semınardy ótkizýge arnaıy kelgen Frankfýrt kitap kórmesi ókilderine qurmet bildirip, aldaǵy ýaqytta Frankfurter Buchmesse ókildigin Almatyda ashý máselesine toqtaldy.
Álemge áıgili Frankfýrt kitap jármeńkesiniń Ortalyq Azııadaǵy alǵashqy semınarynyń Almaty qalasynda, ulttyq ýnıversıtette ótýi jańa múmkindikterge jol ashady. Álemde bolyp jatqan, baspa isi salasyndaǵy jaqsy tendensııa men sońǵy jańalyqtardy Frankfýrt kitap jármeńkesiniń sarapshylarymen birge talqylaý, pikir almasý osy salada júrgen mamandardyń biliktiligin arttyryp, kásibıligin shyńdaı túsedi, – dedi rektor.
Is-shara barysynda sóz alǵan Prezıdent keńesshisi Málik Otarbaev Memleket basshysynyń shetel delegasııasyna zor yqylasyn jetkizdi.
«Búgingi jıyn barlyq kitapsúıer qaýymnyń aıtýly merekesi. Frankfýrt kitap jármeńkesiniń bes ǵasyr ýaqyttan beri úzdiksiz ótip keletinin jaqsy bilemiz. Baspa mashınasyn oılap taýyp, adamzat damýyna ólsheýsiz úles qosqan Iogann Gýtenbergtiń otanyndaǵy osyndaı uıymnyń kitap damýyna júıeli úles qosyp otyrýy úlken qurmetke laıyq, ozyq dástúr. Frankfýrt Eýropanyń kitap astanasy retinde álemdik kitap satatyn ortalyǵyna aınalyp, baspalar men baspahanalardyń halyqaralyq yntymaǵyna jol ashyp keledi. Germanııanyń federaldy syrtqy ister mınıstrligi men Frankfýrt kitap jármeńkesiniń demeýshiligimen Ortalyq Azııada alǵash ret baspa isiniń ózekti máselelerine arnalǵan eki kúndik semınardy ótkizýdi qoldaǵan Frankfurter Buchmesse prezıdenti Iýrgen Boss myrzaǵa arnaıy alǵys bildirgim keledi. О́ıtkeni Frankfýrt kitap jármeńkesi ókilderiniń Almatyǵa kelýi elimizdegi baspagerler, kitap taratýshylar úshin mańyzdy oqıǵa. Semınardyń sala mamandaryna zor áseri bolatyny anyq.
Qurmetti kitapsúıer qaýym, ózderińizge málim bolǵanyndaı, Memleket basshysy «Kitap oqıtyn ultqa aınalýymyz kerek» degen maqsatty Ulttyq quryltaıda aıqyndap berip, ozyq oıly el bolýdyń tıimdi joly kitap ekenin aıtty, kitap oqýǵa, kitaptan tálim alýǵa jáne kitaphanalardyń damýyna mán berýge shaqyrdy. Prezıdent óz sózinde «Kitaphana memlekettiń, ulttyń negizgi jady. Elimiz úshin tarıhı qundy derekter men materıaldardyń deni kitaphanada saqtalady. Sondyqtan kitaphana isin damytýǵa beı-jaı qaraýǵa bolmaıdy» degen bolatyn. Búgingi semınarda kitap shyǵarý, óndirý, taratýmen qatar qandaı kitap jazý kerektigi de aıqyndalady. Semınardyń ótýine tileýlespiz. Rýhanı qazynamyz molaıa bersin», dep atap ótti Málik Otarbaev.
Semınardyń ashylýynda Frankfurter Buchmesse prezıdenti Iýrgen Boss Ortalyq Azııaǵa alǵash at basyn buryp otyrǵan delegasııanyń Almaty qalasynan alǵan áserin jetkizip, Qazaqstannyń baspagerleri, qalamgerlermen osy saladaǵy tájirıbelerimen bólisýge daıyn ekendigin bildirdi. Kitap ındýstrııasyn damytý jáne ádebı dıalogty yntalandyrý úshin osyndaı is-sharalardyń mańyzdylyǵyn aıtyp, sondaı-aq Frankfýrt kitap jármeńkesi men QazUÝ arasyndaǵy yntymaqtastyqtyń damıtynyna senim bildirdi.
Jıynda Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rústem Álı sóz sóılep, qurmetti maımandarǵa jyly lebizin bildirdi.
Frankfýrt delegasııasy quramynda kelgen Mertin Witt ádebı agenttiginiń negizin qalaýshy Nıkol Vıtt, Frankfýrt kitap jármeńkesiniń halyqaralyq jobalar menedjeri Bettına Bek, Frankfýrt kitap jármeńkesiniń negizgi klıentterin basqarý jáne satý jónindegi menedjeri Vladka Kýpska, sıfrlyq basylymdar boıynsha konsýltant, sarapshy German Ekkel arnaıy leksııa oqyp, «Nomad Culture Foundation» qory dırektory Baıan Qabylash «Avtorlyq quqyqtar men lısenzııalardy satyp alý jáne satý», «Frankfýrt kitap jármeńkesi jáne onyń shaqyrý baǵdarlamalary», «Frankfurt Connect jáne Frankfurt Rights» platformasynda suraqtarǵa jaýap berip, pikir almasty.
Qazaqstan Baspagerler, polıgrafıster jáne kitaptaratýshylar assosıasııasynyń prezıdenti Ádil Qoıtanov, Jýrnalıstıka fakýltetiniń dekany Qanat Áýesbaı, «Baspagerlik-redaktorlyq jáne dızaınerlik óner» kafedrasynyń kafedrasynyń meńgerýshisi, professor aıgúl Ramazan, dosent, aǵa oqytýshysy Qońyr Muqataeva baspagerlik jáne baspa isine mamandar daıarlaý týraly baıandasa, Kitap palatasy dırektorynyń orynbasary Tolqyn Sálmenbaeva kitap kórmesine qatysty baspagerler suraqtaryna jaýap berdi.
Álem elderi baspagerlerin bir alańǵa jınaıtyn Frankfýrt jármeńkesi Qazaqstan qalamgerleri, baspagerleri, polıgrafısteri men kitap taratýshylary úshin kitap jazý, shyǵarý, taratý isindegi zamanaýı jańalyqtardy ıgerip, yqpaldasýǵa mol múmkindik beredi.
Semınarǵa «Atamura», «Almatykitap», «Mektep», «Folıant», «Rarıtet», «Arman-Pv», «Qasym kitap», «Otbasy hrestomatııasy», «Amalbooks» baspasy men kitap satýshylar qoǵamynyń ókilderi qatysyp, Frankfýrt jármeńkesi tájirıbesindegi baspagerlik, polıgrafııa jetistikteri jaıyndaǵy zamanaýı jańalyqtarmen bólisip, pikir almasty.
Bıyl Frankfýrt kitap kórmesinde Mádenıet jáne aqparat mınıstrliginiń qoldaýymen Qazaqstan stendi uıymdastyrylyp, 300-den astam baspa ónimderi qoıylǵan bolatyn. Aıtýly sharaǵa álemniń 150-den astam elinen 200 myńnan astam kitap súıer qaýym qatysty.
ALMATY