«Jas aǵash ıilgish keledi» degendeı, jas sana qaıbir ónerge de ıkemdi. Elimizdiń erteńine tórelik eter jastardy qoldaý, olarǵa qanat bitirý – ult bolashaǵyna qalanǵan irgetas. Búginde oqýshy-jastarǵa arnalǵan ártúrli ıgi bastama júzege asyrylyp jatyr.
13–15 qarasha kúnderi elordada shyǵarmashyl oqýshylar arasynda XI respýblıkalyq «Aqberen» óner baıqaýy ótti. Elimizdiń ár óńirinen 123 oqýshy baq synaǵan is-shara jas daryndardyń óneri men bilimi anyqtalatyn erekshe alańǵa aınaldy.
Baıqaýdyń saltanatty ashylý rásiminde Májilis depýtaty, aıtysker aqyn Amanjol Áltaı qatysýshylardy quttyqtap, jas urpaqtyń ulttyq mádenıetti damytýdaǵy róline zor senim bildirdi.
«Talaptyń tulparyn mingen, talanttyń tuǵyryna qonǵan, bilimniń shyraǵyn jaqqan sizderdeı jalyndaǵan jastarmen birge bolǵanymyzǵa qýanyshtymyz. Qazaqstannyń jarqyn bolashaǵy sizderdiń qoldaryńyzda», dedi ol.
Jas ónerpazdar «Sheshendik, bilgirlik saıysy», «Aqyndar músháırasy», «Kórkem sóz oqý», «Esse jazý», «Ulttyq aspapta óner kórsetý», «Aqyndar aıtysy» sekildi alty atalym boıynsha ózara talasqa tústi. Úzdik oqýshylardyń jigerin shyńdaǵan biregeı jobada qazylar alqasynyń tóraǵasy aqyn Janat Áskerbekqyzy jas talanttarǵa shyǵarmashylyq tabys tiledi.
«Abaıdyń «Adam balasy aqyl, bilim, ar, minezben ozady» degen sózi eshqashan mánin joǵaltpaıdy. Búgin osynda jınalǵan talapty oqýshylardyń óneri men biliminiń kýási boldyq. Qanattaryńyz talmasyn!», dedi Janat Áskerbekqyzy.
Baıqaý qorytyndysynda eń úzdik 6 qatysýshy Oqý-aǵartý mınıstrliginiń bas júlde atalymdyq dıplomymen, 12 jeńimpaz I dárejeli dıplomymen, 18 júldeger II dárejeli dıplomymen jáne 30 qatysýshy III dárejeli dıplomymen marapattaldy. Sonymen qatar barlyq qatysýshyǵa estelik syılyqtar tapsyryldy.