Batys Qazaqstan mashına qurastyrý kompanııasy amerıkalyq Lancair áýe fırmasy mamandarymen birlese otyryp týrbovıntti qozǵaltqyshy bar shaǵyn ushaq qurastyryp shyǵardy.
Atalǵan tájirıbelik jobany otandyq óndirisshiler jańa tehnologııalyq áýe tásilderin ıgerý maqsatynda iske asyrǵan. Qazaqstandyq ushaq qurastyrmaly kómirsýtegi materıalynan jasalǵan. Munyń ózi oǵan kók júzinde erkin qalyqtaýyna múmkindik beredi, deıdi joǵaryda atalǵan kompanııa basshysy Álibı Ahmedjanov. Sondaı-aq, onyń málimdeýinshe, birlesken ushaq jobasyn qurastyryp synaqtan ótkizýge memleket tarapynan eshqandaı qarjy jumsalmaǵan.
Kompanııanyń bas konstrýktory Vladımır Gaslov aldaǵy ýaqytta mundaı ushaqty jınaqtaýdy bir aıdyń ishinde aıaqtaýǵa bolatynyn aıtyp berdi. Másele suranysta jáne onyń sanynyń mólsherine baılanysty. Otandyq shaǵyn áýe kemesiniń senimdiligi osy tektes barlyq úlkendi-kishili ushaqtar sekildi 99,9 paıyzǵa teń. Onyń qaýipsizdigi men jaramdylyǵyn júz paıyzdyq dep aıtpasaq ta, saýatty áli bilikti túrde paıdalanylǵan jaǵdaıda bul tolyǵymen óte senimdi ushaq dedi ol odan ári.
Lancair 4-tiń qýaty jeti júz attyń kúshine teń. Kommersııalyq maqsatty kózdemeıtin shaǵyn ushaqtyń salony úsh jolaýshyǵa arnalǵan. Bul tuıǵyndaı yqsham áýe kóligi saǵatyna 500 shaqyrym jyldamdyqpen eki myń kılometrge deıin toqtamastan usha alady.Onyń bir saǵatta jumsaıtyn janarmaıynyń kólemi 160 lıtr. О́tken aptada Oral áýejaıynda ótkizilgen kórsetilimdik ári synaqtyq ushý kezinde otandyq ushaq kókke emin-erkin kóterilip, áýejaı aýmaǵyn bir-eki ret aınalyp ushyp ótip, sodan keıin mundaǵy ushý-qoný jolaǵyna tómendep kelip qondy. Osy arqyly ol óziniń shassıiniń beriktigin dáleldep berdi deýge bolady.
Temir QUSAIYN,
«Egemen Qazaqstan».
ORAL.
Sýrette: otandyq ushaqtyń syrtqy kórinisi.