Shyǵys Qazaqstan oblysyna jumys sapary aıasynda Premer-mınıstrdiń orynbasary Tamara Dúısenova óńirdegi áleýmettik nysandardy aralap, sala mamandarymen kezdesti. Kezdesý barysynda densaýlyq saqtaý men bilim salasyn jańǵyrtý, sporttyq ınfraqurylymdy damytý máselelerine basa nazar aýdaryldy.
Vıse-premer Rıdder qalasynyń turǵyndary úshin kópten kútken joba kópsalaly aýrýhana kesheniniń qurylys barysymen tanysty. Qurylysty qarjylandyrý tolyǵymen qamtamasyz etildi, Memleket basshysynyń tapsyrmasy boıynsha «Zańsyz ıemdenilgen aktıvterdi memleketke qaıtarý týraly» zań sheńberinde qaıtarylǵan qarajattan 28,2 mlrd teńge bólindi. Bul sheshim jergilikti turǵyndardy erekshe qýantty.
Merdiger uıymdardyń ókilderi qazirgi ýaqytta sátti sheshilgen qarjylyq qıyndyqtarǵa qaramastan, nysandaǵy qurylys jumystary úzilissiz jalǵasqanyn aıtty.
Memleket basshysy densaýlyq saqtaý salasyna erekshe kóńil bóledi. Aýrýhana kesheniniń qurylysyn aıaqtaýǵa qarjy qarastyryldy. Endi jergilikti ákimdik jumystyń sapaly júrgizilýin qadaǵalaýy kerek. Nysan medısınalyq qyzmet sapasyn arttyrýǵa yqpal etetini sózsiz. Onda bilikti mamandardy jumyldyrý qajet», dep atap ótti T.Dúısenova.
Medısınalyq qaýymdastyq ókilderimen ótken keńeste óńirdiń densaýlyq saqtaý júıesin damytý máseleleri talqylandy. Kezdesýde qazirgi kórsetkishter men qol jetkizilgen nátıjelerge taldaý júrgizildi. Vıse-premer aýrýdy erte dıagnostıkalaýdyń joǵary sapasyn qamtamasyz etýdiń mańyzyna toqtaldy. Mindetti medısınalyq saqtandyrý júıesine engizilgen azamattar úshin medısınalyq qyzmetterdiń qoljetimdi bolýyn qamtamasyz etýge erekshe nazar aýdaryldy.
Sapar aıasynda Premer-mınıstrdiń orynbasary taǵy bir mańyzdy nysan – elimizdegi qysqy sport túrleri boıynsha olımpıadalyq rezervtiń jalǵyz respýblıkalyq mamandandyrylǵan mektep-ınternatyna bardy. Bul – 250 oqýshyǵa arnalǵan biregeı oqý orny. Munda sportshylardy daıarlaýmen 179 bilikti maman aınalysady. Mektep-ınternattyń jumysymen tanysqan T.Dúısenova sport uıymdarynyń óńirlik basshylarymen keńes ótkizdi. Kezdesý barysynda sport salasyn damytýdaǵy aldaǵy ózgerister talqylandy.
Týrızm jáne sport vıse-mınıstri Serik Jarasbaev qazir Parlament qabyrǵasynda qarastyrylyp jatqan salalyq zańdaǵy negizgi tarmaqtar týraly baıandady. Onyń ishinde basym sport túrlerin damytý, salany basqarý ádisi, sıfrlandyrý jáne balalar men jasóspirimder sport mektepterindegi qarjylandyrý sekildi birqatar másele qamtylǵan.
–Vıse-mınıstr reformalar sporttyq jetistikterdi arttyrý, qarjylyq ashyqtyqty qamtamasyz etý jáne jattyqtyrýshylar quramynyń jalaqysyn ulǵaıtý úshin resýrstardy shoǵyrlandyrýǵa baǵyttalǵanyn atap ótti.
Sonymen qatar T.Dúısenova «Aýyl amanaty» baǵdarlamasyna qatysýshylar usynǵan ónimder kórmesine bardy. Onda azyq-túlik, jeńil ónerkásip ónimderi, qolóner buıymdary qoıyldy. 2,5%-dyq ústememen qaryz alǵan azamattar baǵdarlamanyń óte tıimdi ekenin aıtýda. Kórme «Altaı» kóterme-taratý ortalyǵynyń aýmaǵynda uıymdastyryldy. Nysan qurylysynyń birinshi kezeńi aıaqtalyp, kólemi 18 myń tonnaǵa deıin kókónis saqtaı alatyn qoıma jumys isteýde. Jaqyn arada munda saýda jáne jármeńke alańy iske qosylady.
Vıse-premer ortalyqtyń jumysyn oń baǵalady, al oblys ákimdigi jergilikti óndirýshilerdi keshendi qoldaýdyń mańyzyn atap ótti.
Shyǵys Qazaqstan turǵyndary úshin óndiriletin ónimdi ótkizýdiń jańa múmkindigi paıda boldy: óńirdegi eń iri kásiporyndardyń biri «Kazsınk» jergilikti aýyl sharýashylyǵy taýaryn óndirýshilerden azyq-túlik satyp alý kólemin ulǵaıtady. Osy maqsatta oblys ákimdigi men kásiporyn arasynda memorandýmǵa qol qoıyldy. «Kazsınk» bul maqsatqa elimizdegi barlyq fılıaldary úshin 800 mln teńge bóledi.
Aımaqta «Aýyl amanaty» aıasynda ózge de kásip túrleri qolǵa alynǵan. Máselen, Glýbokoe aýdanyndaǵy Natalıa Svahına ekotýrızm baǵytyn tańdaǵan. Shaǵyn nesıe arqasynda ormandy aýmaqta demalys úıin turǵyzypty. Munda demalýshylar taza aýamen tynystap qana qoımaı, ekofermadan shyqqan tabıǵı taza ónimderdi tutyna alady. Joba aıasynda 3 adam jumyspen qamtylyp, turaqty tabys taýyp otyr.
Premer-mınıstrdiń orynbasary Tamara Dúısenova oblys ákimi Ermek Kósherbaevtyń jáne aýdandar men aýyldyq okrýgterdiń ákimderiniń qatysýymen keńes ótkizdi. Memlekettik baǵdarlamalardy iske asyrý arqyly halyqtyń tabysyn arttyrý máselelerine basty nazar aýdaryldy. Sonymen qatar kezdesýde osy baǵyttaǵy basqa óńirlerdiń tabysty tájirıbeleri talqylandy. Vıse-premer oblys ákimdigine Memleket basshysy qoıǵan mindetterdiń sapaly ári ýaqtyly oryndalýyn qamtamasyz etý úshin qajetti sharalar qabyldaýdy tapsyrdy.
Sondaı-aq sapar aıasynda T.Dúısenova óńirdegi bilim berý nysandarynyń jumysymen tanysyp, Memleket basshysy tapsyrmalarynyń oryndalý barysyn tekserdi. Aımaq basshysy Ermek Kósherbaevpen birge sala ókilderiniń qatysýymen keńes ótkizdi.