Abaı oblysyna qarasty Borodýlıha aýdany Jezkent mektep-lıseıiniń 9-synyp oqýshysy Nurálı Amangeldıev sybaılas jemqorlyqqa qarsy «Satylmaıtyn Alpamys» atty kompıýterlik oıyn jasap shyǵardy, dep habarlaıdy Egemen.kz.
Oıynnyń basty maqsaty – oqýshylarǵa sybaılas jemqorlyqtyń zııanyn túsindirip, oǵan qarsy turý mádenıetin qalyptastyrý.
Oıyn kvest formatynda jasalǵan. Munda oıynshy ózine jasyryn agent nemese jýrnalıst rólin tańdaı alady. Sondaı-aq tergeýdi kimge qatysty júrgizetinin de ózi sheshedi: sot, prokýror nemese memlekettik qyzmetshi. Oıyn barysynda ol ártúrli epızodtardan ótip, jemqorlyqqa qarsy áreketterdiń qyr-syryn meńgeredi jáne oıyn sońynda jemqorlyqty áshkereleıdi.
Oqý-aǵartý mınıstrliginiń baspasóz qyzmeti málim etkendeı, qazirgi ýaqytta oıyn mektepte quqyq negizderi sabaǵynda tájirıbe retinde qoldanylyp júr. Avtor bolashaqta atalǵan jobany uıaly telefondarǵa arnalǵan tegin qosymsha retinde úsh tilde usynbaqshy. Osy maqsatta ol ótken jyly I respýblıkalyq sybaılas jemqorlyqqa qarsy jobalar baıqaýynda jeńip alǵan 1 000 000 teńge syıaqysyn oıyndy damytýǵa jumsaǵan. Sonymen birge oıynnyń ár kezeńine Abaıdyń qara sózderin qosý arqyly onyń rýhanı mazmunyn baıytýdy josparlap otyr.
«Oıyn Qazaqstandaǵy naqty oqıǵalarǵa negizindelgen kórkem roman formatynda jasalǵan. Ár epızodta Qylmystyq kodekske túsindirme berilip, oqýshylardyń quqyqtyq saýaty artady. Al oıyn sońynda kóp upaı jınaǵan oıynshy jeńimpaz atanady», deıdi jas ónertapqysh.
«Satylmaıtyn Alpamys» – oqýshylardyń quqyqtyq saýattylyǵyn arttyryp, jemqorlyqqa qarsy minez-qulyqty qalyptastyrýǵa arnalǵan erekshe jobaǵa aınaldy.