Balabaqshadaǵy tárbıeshi aǵaı

Alǵashynda ata-analar er adam­nyń balabaqshada tár­bıeshi bolyp júrgenin qabyldaı almapty. Biraq ýaqyt óte kele onyń tobyna ul-qyzyn bergisi keletin ata-analar kóbeıgen.

«Balalardy tárbıeleý ońaı emes. Sol úshin barlyq isińde ózińe esep bere alatyndaı muqııat bolýyń kerek. О́ıtkeni olardyń árqaısysyna jaýap beresiń, kózińnen tasa qaldyrýǵa bolmaıdy. Únemi qadaǵalap otyrý kerek. Biraq óz isińdi unatsań, onyń qıynshylyǵy da qyzyq bolyp kórinedi emes pe?

Toptaǵy balalardy dárethanaǵa aparý, qyzdardy kıindirý jumystaryn kómekshim Janar Qabylqyzyna tapsyramyn. Jalpy, men bul jumysqa kelgenime esh ókinbeımin. Balalarmen jumys istegennen jurt oılaǵandaı júı­kem juqarmaıdy, kerisinshe olardyń shynaıylyǵynan shabyt alamyn. Jas urpaqty tárbıelep, qoǵamdy jaqsy­lyq­qa baǵyttaǵym keledi. Kópshiliktiń er tárbıeshilerge tiksine qaraıtyny bel­gili. Biraq bul qyzmetti tek áıelder­diń mamandyǵy degen pikirdi joq­qa shy­ǵarǵym keledi», deıdi ol.

Júrek qalaýyn taýyp, jumysyn «ma­mandyqtyń tóresi» dep baǵalaıtyn Arman aǵaı eńbek jolyn Býrabaı aýda­nynyń Urymqaı aýlynda bastaýysh synyp muǵalimi qyzmetinen bastaǵan. Al tárbıeshilik qyzmetke kelýi kezdeısoq bolypty.

«Mektepte júrgende-aq muǵalim bolsam dep armandaıtynmyn. Biraq balabaqshada tárbıeshi bolamyn dep esh oılaǵan joqpyn. Oqýǵa qujat tapsyrar sátte bastaýysh synyp muǵalimi mamandyǵyn tańdadym. Osylaısha, 2001 jyly Shýchınsk qalasyndaǵy Peda­gogıkalyq kolledjiniń bastaýysh synyp muǵalimi mamandyǵyn támamdadym. Qyzyǵy sol, «Arman» mektepten tys oqy­tý-tárbıeleý ortalyǵynda qyzmet etip júr­genmin. Ol jaqta 4-5 jastaǵy balalar­ǵa ar­nalǵan orystildi stýdııa bar edi. Bir kúni mu­ǵalimderi kelmeı qalyp, meni sol balalar­men jumys isteı turýǵa jiberdi. Men bar yqylasymmen sabaq berip shyqtym. Sol kezde áriptesterim balaqaılarmen jaqsy til tabysatynymdy ańǵaryp, oń baǵasyn berdi. Osylaısha, ortalyqtyń dırektory Aıgúl Aıtjanqyzy stýdııany qa­zaq tilinde de ashsaq degen usynysyn aıt­ty. Men birden kelistim. «Bolashaq» de­­gen atyn da ózim usyndym. Sodan beri osy or­talyqtyń tárbıeshisimin», deıdi ol.

Aıta keteıik, Arman Káribaıuly – Aqmola oblysyndaǵy mektepke deıingi mekemelerde tárbıeshi bolyp jumys isteıtin jalǵyz er-azamat. Ol kóptegen baıqaýda júldeli oryn ıelenip, óziniń bilikti maman ekenin san márte dáleldegen. «Tárbıeshi aǵaı» sabaqty kóbine-kóp oıyn túrinde ótkizedi eken. Bastapqyda oryssha shúldirlep kelgen balalar osy jerde qazaqshany úırenip, qazaq mektepterine baryp jatqan kórinedi.

Balalar-jasóspirimder shyǵarma­shy­lyq ortalyǵy dırektorynyń mindetin at­qarýshy Lázzat Egemberdıevanyń aıtýynsha, bala tárbıesinde er adamnyń róli zor.

«Tárbıeshi – qıyn da qy­zyqty ma­man­dyqtyń biri. Oǵan árkimniń júregi daýalamaıdy. Qazir er adamdar­dyń kóbi jumysbasty. Sondyqtan da bala tárbıesimen analar kóbirek aınalysady. Mektepte de oqýshylarǵa sabaq be­rip júrgen muǵalimderdiń basym kóp­shiligi – áıelder. Bul – balanyń mi­nez-qulqyna keri áser etedi, qyz minez­di jigitterdiń kóbeıýi sonyń saldary. Qazaqtyń turmys-saltynda bala tár­bıe­simen analar aınalysqanymen, er-aza­mattyń qas-qabaǵy, mysy, biraýyz sózi kóp nárseni sheshedi. Al endi osy sala­ǵa óziniń qulshynysymen kelgen Arman Káribaıulynyń eńbegi maqtaýǵa turarlyq. Balalardy uıymdastyrýy, qundylyqqa negizdelgen sabaq ótkizý ádisi bizdi erekshe tánti etti», deıdi L.Egemberdıeva.