Aksııa maqsaty – ana men bala quqyn qorǵaý

25 qarasha men 10 jel­toqsan araly­ǵynda ótetin bul aksııa búkil el aýmaǵyn qamtıdy. Áıelder men ba­la­­lar­dyń quqyqtaryn qor­ǵaýǵa baǵyt­tal­ǵan is-shara Aqjaıyq óńirinde de bas­taý aldy. Baspasóz konferen­sııasyna kelgen oblys áki­miniń genderlik saıasat máse­leleri jónindegi shtattan tys keńes­shisi Jansulý Tóre­muratova, BQO polısııa departamenti jergilikti polısııa qyzmeti basqarmasy bastyǵynyń orynbasary Arman Dúısekenov, «Aq otaý» otbasy ortalyǵy» qoǵamdyq birlestiginiń tóraıymy Alty­naı Esqa­lıeva qoǵamnyń nazaryn genderlik zorlyq-zom­bylyq máselesine aýdardy.

Is-shara turmystyq zor­lyq-zombylyqtyń aldyn alý, áıel men bala quqy­ǵyn qor­­ǵaýǵa baǵyttalǵan. Ak­sııa «Beıjiń deklarasııa­sy men is-qımyl platforma­sy­­nyń 30 jyldyǵyna oraı: áıel­­derge qatysty zor­­lyq-zombylyqty toqtatý úshin birigeıik» uranymen ótedi.

– Aksııa aıasynda mem­le­kettik organdar, ha­lyq­ara­lyq jáne úkimettik emes uıym­­dar eldiń barlyq óńi­rin­­­de kóshpeli kezdesýler ót­ki­­zip, turǵyndarǵa tur­mys­­­tyq zorlyq-zom­bylyqtan qor­­­ǵaný algo­rıtmin tú­sindi­­re­di. Elimizdegi daǵda­rys or­talyqtary ar­qyly áıelderge quqyqtyq, psıho­lo­gııalyq jáne áleý­mettik kómek beriledi. Son­daı-aq LED-ekran­darda jáne kınoteatrlar­da arnaıy beınerolıkter oınap, «111» biryńǵaı mem­le­kettik senim telefony arqy­ly zorlyq-zombylyq qur­ban­daryna shuǵyl kómek kór­se­tiledi, – deıdi Jansulý Meńeshqyzy.

Turmystyq zorlyq-zom­by­lyq qurban­daryn qol­­daý maqsatynda Oral qala­syndaǵy memle­kettik daǵda­rys ortalyǵynda – 10 oryn, al Aqsaı qalasyn­daǵy úki­mettik emes uıym basqara­tyn ortalyqta 9 oryn jab­dyqtalyp, qyzmet kórsetip jatyr. Bıyl óńirde 379 áıel osy ortalyqtardyń kóme­gine júgingen eken. Arman Qusaıynulynyń aıtýynsha, jyl basynan beri 35 áıel polısııa joldamasymen ýaqytsha baspanamen qamtamasyz etilgen.

Áıel men balany qor­ǵaý – tek memlekettik or­gan­dar­dyń mindeti emes. Qoǵam­nyń ár azamaty osy baǵyttaǵy basta­malarǵa belsene qatysýǵa tıis.

Batys Qazaqstan oblysy