Ońtústik Koreıanyń Sandjý qalasyn-da kúres túrlerinen ótken «Korea Open» týrnırinde elimizdiń balýandary alty júlde jeńip aldy. Burymdy balýandar arasynan shyqqan tuńǵysh Olımpıada júldegeri Elmıra Syzdyqova (76 kg) altynnan alqa taqsa, Aıbek Aıtbekov (60 kg) pen Dıas Seıitqalıev (77 kg) fınalda utyldy. Al Maqsat Saılaý, Temirlan Turdaqyn (87 kg), Nurasyl Amanáli (97 kg) qola medalǵa ıe boldy.
29 qarasha men 1 jeltoqsan aralyǵynda Reseıdiń Sankt-Peterbýrginde «Soltústik Palmıranyń trofeıleri» dep atalatyn kommersııalyq týrnır ótedi. Sol jarysta elimizdiń tennısshileri Aleksandr Býblık pen Iýlııa Pýtınseva óner kórsetedi.
30 qarashada Túrkistanda aralas jekpe-jekten «Alash Pride» 102 týrnıriniń tusaýy kesiledi. Osy jarysta jeńil salmaqtyń chempıondyq ataǵy sarapqa salynady. Altyn belbeýge tartys qandasymyz Salamat Esbolaev (6-0) pen qyrǵyzstandyq Nurjan Rýstamov (17-8) arasynda ótýge tıis edi. Alaıda sońǵy sátte Nurjan jarysqa qatysýdan bas tartty. Endi Salamattyń kimmen judyryqtasatyny búgin belgili bolady.
Ártistik júzýden Vıktor Drýzın «World Aquatics» halyqaralyq federasııasynyń nusqasy boıynsha «Jyl sportshysy» ataǵyna úmitkerler tizimine endi. Otandasymyzdan bólek, bul ataqtan úmitkerler qatarynda ıtalııalyq Djordjıo Mınısını, amerıkalyq Kennet Gaýde, ıspandyq Dennıs Gonsales, kolýmbııalyq Gýstavo Sanches bar.
Qarasha aıynyń sońǵy kúni Fınlıandııanyń Kontıolahtı qalasynda bıatlonnan Álem kýboginiń birinshi kezeńi bastalady. Atalǵan dodada elimizdiń 9 sportshysy óner kórsetedi. Olar – Áset Dúısenov, Aleksandr Mýhın, Vladıslav Kıreev, Vadım Kýrales, Kırıll Baýer, Arına Krıýkova, Galına Vıshnevskaıa-Sheporenko, Olga Poltoranına, Polına Egorova. Básekeler 8 jeltoqsanǵa deıin sozylady.