Bıylǵy oraqta Soltústik Qazaqstan oblysy 6,2 mln tonna astyq jınap, rekordtyq deńgeıge jetkenin habarlaǵanbyz. Ekonomıkanyń basqa salalaryndaǵy kórsetkishter de joǵary bolyp, respýblıkada aldyńǵy orynǵa shyǵyp otyr.
Soltústik Qazaqstan oblysy Ekonomıka basqarmasynyń basshysy Qýanyshbek Qalıjanovtyń málimetine súıensek, ótken jyldyń sáıkes kezeńimen salystyrǵanda qurylys jumystary 27,3%-ǵa, turǵyn úı qurylysy – 22,9%-ǵa, aýyl sharýashylyǵy – 30,2%-ǵa, ınvestısııalar kólemi – 9,4%-ǵa, bólshek saýda 1,2%-ǵa ósken.
Aýyl sharýashylyǵynda egistikpen qatar basqa ónimderdiń artýy on aıda 30,2% quraǵan. Respýblıka boıynsha bul kórsetkish 12,7%. Alaıda mal sharýashylyǵyndaǵy ósim mardymsyz, bar bolǵany 0,7 paıyz. Sút óndirý – 5,6%, jumyrtqa 4,9% artqan.
Mal sharýashylyǵy kenje qalyp otyrǵan aýdandar qatarynda Qyzyljar, Mamlıýt, Aıyrtaý aýdandary ataldy. Olar mal basyn arttyrýda da, et óndirýde de oblys deńgeıinen tómende qalyp otyr. Sonyń ishinde Qyzyljar aýdanynda et óndirý byltyrdyń sáıkes merzimimen salystyrǵanda 17 paıyzǵa quldyrap ketken. Aýdan ákimi Saqtaǵan Sádýaqasovtyń aıtýyna qaraǵanda munyń basty sebebi broıler qus fabrıkasynyń jabylýymen baılanysty eken. «Biz qazir basqa taýar óndirýshilerimizdi qoldap, et ónimin arttyrý jolynda jumys júrgizip jatyrmyz. Jyldyń aıaǵyna deıin et óndirý boıynsha belgilengen mejege jetip qalarmyz», dedi ol. Al osy kórsetkishi 2023 jylmen salystyrǵanda 9 paıyzǵa túsip ketken Mamlıýt aýdanynyń saılanǵan ákimi Elena Stepanenko jaǵdaıdy tek kelesi jyly túzetý múmkindigi baryn aıtty. «Bizde mal tuıaǵynyń azaıýy baıqalady. Aýdandaǵy agroqurylymdarmen bul tarapta jumys júrgizip jatyrmyz. Kelesi jyly 400 tuıaq mal bordaqylaıtyn sharýashylyqqa memleket tarapynan qoldaý jasaldy. Sonymen qatar qoı-eshkiniń sanyn arttyryp, 2 myńǵa jetkizý josparymyzda tur», dedi ol.
Oblys ákimi aýyl sharýashylyǵynyń jalpy ónimin byltyrǵymen salystyrǵanda 135-140 paıyzǵa arttyrý mindeti belgilengenin jınalǵandardyń esine saldy. «Al bizde atalǵan aýdandar belgilengen jospardy oryndaı almaı otyr. Aýdan ákimderine osy taraptaǵy jumystardy jandandyrý kerektigi buryn da aıtylǵan. Biraq másele sol kúıinde sheshilmeı, kórsetkishter artta qalyp otyr. Bizdiń oblystyń et óndirý jóninen aýtsaıderleri – osylar», dep oblys ákimi Ǵaýez Nurmuhambetov artta qalǵan aýdan ákimderine qatań eskertý jasady.
On aılyq merzimde oblystyń ónerkásip salasy 548,5 mlrd teńgeniń ónimin shyǵaryp, byltyrǵy jyldyń sáıkes merzimimen salystyrǵanda 113,0% oryndalýǵa qol jetkizgen. On aıda ekonomıkaǵa tartylǵan memlekettik jáne jekemenshik ınvestısııa kólemi 370,6 mlrd teńgeni qurap, 109,4 paıyzǵa artqan. Al qurylys jumystarynyń ósý qarqyny byltyrǵymen salystyrǵanda 27,3 paıyzǵa artyp, 147,4 mlrd teńgeniń jumysy atqarylǵan. Respýblıkalyq ortasha ósim kórsetkishi – 110,2 paıyz. Qurylystyń qarqyndy ósiminiń arqasynda 10 aıda oblysta 187 myń sharshy metr turǵyn úı paıdalanýǵa berildi. Byltyrǵa qaraǵanda bul ósim 22,9 paıyzǵa artqan.
Bólshek saýdadaǵy ósim de byltyrǵydan asyp tústi. Byltyr 306 mlrd teńgeniń taýary satylsa bıyl ol 330 mlrd teńgege jetken.
Alaıda bıylǵy jyldyń 10 aıynda memlekettik bıýdjettiń oryndalý jospary 87,7 paıyz bolyp otyr. Josparda belgilengen 174,7 mlrd teńgeniń ornyna ol 153,3 mlrd teńgege oryndalǵan. Esesine jergilikti bıýdjet 103,3 paıyzǵa oryndalyp, jospardaǵy 97,4 mlrd teńgeniń ornyna 100,6 mlrd teńge túsken.
Soltústik Qazaqstan oblysy