Biz óz qundylyqtarymyzdy naqtylap, ekshep, tarazyǵa salyp, tanı bilmesek, olardy qoǵamymyzdy damytýda, ultymyzdyń keleshegin qamdaý jolynda basshylyqqa almasaq, ózindik ustanym, tanym-túsinik, bolmysymyzdy, ulttyq kelbetimizdi saqtaı otyryp órkenıet kóshine ilese almaımyz. Sondyqtan bizge jalpyulttyq qundylyqtar júıesin belgilep, ony bekitý asa mańyzdy.
Osy oraıda bıyl Atyraýda ótken Ulttyq quryltaıda Memleket basshysy Qasym-Jomart Toqaev qoǵamymyzda jańa etıka qalyptastyrý qajettigine basa nazar aýdara kelip, ıdeologııalyq tujyrymdarymyz ben negizgi baǵyttarymyz – jalpyulttyq qundylyqtar júıesin Táýelsizdik pen Otanshyldyq, Birlik pen Yntymaq, Ádildik pen Jaýapkershilik, Zań men Tártip, Eńbekqorlyq jáne Kásibı biliktilik, Jasampazdyq jáne Jańashyldyq uǵymdary negizinde qurýdy atap kórsetti.
Árıne, búginde qoǵamǵa qandaı da bir qundylyqtardy májbúrlep engizý múmkin emes. Biraq Prezıdent kún tártibine shyǵaryp, halyqqa usynǵan joǵaryda atalǵan qundylyqtar júıesine esti adam qarsylyq tanytyp, bura tartar pikirin bildirmeıtini anyq. О́ıtkeni bolashaqqa senimmen qarap otyrǵan halqymyz osynaý qundylyqtardyń qoǵamda ornyǵýyna, osyndaı jalpyulttyq baǵdardyń belgilengenine múddeli.
Bul aıtylyp otyrǵan máseleler – jalpyhalyqtyq is. Buǵan azamattyq qoǵamnyń, jalpy halyqtyń qoldaýy qajet. Onsyz oń nátıjege jetý neǵaıbyl. Bizge qazirgi tańda ýaqyt talabyna, zaman suranysyna saı is-qımyl kerek-aq. Bul qajettilikterdi iske asyrý úshin aıaqqa oralǵy bolyp kele jatqan eski, taptaýryn kózqarastar men damýǵa keri áser etýden basqa eshteńesi qalmaǵan, resýrsy taýsylǵan, kerisinshe keleńsiz, joıdasyz áreketterge aınalǵan is-qımyldardan arylý abzal. Bulaı etpeıinshe ilgerileý, ilkimdi oıǵa júginý, izgi nıettiń shaýjaıyna jarmasý qıyn.
Búgingi qoǵamymyzdy jeńiltektik, sabyrsyzdyq, baıybyna baryp jatpaı baıbalam salý, orynsyz daýryǵý, kópke oılanbastan topyraq shashý, jazyqtyny tergep-teksermesten jardan qulatyp jiberý, jazyqsyzǵa jala jaýyp, janyn jaralaý, ıgi isterdi kóleńkede qaldyrý, kórmeý, qıt etkendi eldiń, Otanymyzdyń basty olqylyǵy retinde kórsetýde jarysý, taǵysyn taǵylar «bılep-tóstep» tur. Mundaı jaǵymsyz kórinisterge toqtam salý, ony shiderlep, tusaý úshin joǵaryda atalǵan qundylyqtar júıesin ómirsheń etýdi, laıyqty qoldanýdy, basshylyqqa alýdy basty mindetterimizdiń biri retinde qarastyrý qajet-aq. Muny júzege asyrýǵa el áleýeti tolyq jetedi. Bul, Prezıdent sózimen aıtqanda, álemde «zańnyń kúshi emes, kúshtiniń zańy» degen qaǵıdat ústemdikke ıe bolyp, egemendigi osal memleketterdiń mańdaıyna ózgege kiriptar bolý jazylǵan-mys degen paıymǵa jol berile bastaǵan búgingi zamanda óte ózekti.
Qoǵamdy damytýda, zaman talabyna saı is-qımyl jasaýda memleketshil, adal azamattardy úlgi etý, olardyń qabilet-qarymyn ıgilikti isterge baǵyttaý mańyzdy. Bul óz kezeginde qundylyqtarymyzdy qoǵamnyń durys, óz deńgeıinde qabyldaýyna, halqymyzdyń mádenı-rýhanı ómirin zaman suranysyna saı beıimdeýge, sol arqyly negizgi mindetterimizdi belgilep, ony laıyqty oryndaýymyzǵa jol ashady. О́ıtkeni adal azamat qundylyqtardy tý etip, onyń baǵasyn árdaıym kótere biledi. Sondyqtan adal adam ulttyq qundylyqtarymyzdyń eń bastylarynyń biri retinde dáriptelýge tıis. Adal azamattardy nasıhattaýda aqparattyq ozyq tehnologııalar keńinen qoldanylǵany abzal. Sonymen qatar ádebıet, kıno, mýzyka salalarynda adal azamat beınesi basty keıipker retinde kórinip, halyq nazaryna laıyqty deńgeıde usynylýy qajet.
Adal adamnyń ustanymy – ádildik pen jaýapkershilik. Osyndaı adal adamdardyń qatary qalyń bolsa, eldiń de jospary aýqymdy, eńsesi bıik, qadamy nyq.
Prezıdent aıtqandaı, «Ádiletti Qazaqstan – Adal azamat – Ozyq oıly ult» degen úshtaǵan uǵym el bolashaǵynyń negizgi sıpatyn kórsetedi. Al ádiletti qoǵam qura alǵan, adal azamatyn ardaqtaı bilgen jurt qashanda ozyq oıly, óz qundylyqtarynyń qadirin biletin ult sanatynda bolatyny belgili. Al munyń irgetasy Prezıdent usynǵan «Adal azamat – Adal eńbek – Adal tabys» qaǵıdatyn ustanǵanda ǵana berik qalanbaq.