Temirtaý qalasynda zańsyz maınıng fermasyn uıymdastyrý faktisi Qaraǵandy oblystyq prokýratýrasynyń úılestirýimen Qarjylyq monıtorıng agenttigimen anyqtaldy, dep habarlaıdy Egemen.kz QMA baspasóz qyzmetine silteme jasap.
Kúdiktiniń Temirtaý qalasyndaǵy óndiristik baza aýmaǵynda metall konteınerlerde krıptovalıýta óndirý úshin arnaıy jasalǵan esepteý qurylǵylarynyń keshenin ornatqany anyqtalǵan.
«Tintý barysynda obektiden 156 birlik maınıng jabdyqtary (ASIC) jáne basqa da qosalqy qurylǵylar tabylyp, tárkilendi. Qazirgi ýaqytta aldyn ala tergeý júrgizilip jatyr. Tergeý aıasynda Qazaqstan Respýblıkasy Qylmystyq-prosesstik kodekstiń 201-babyna sáıkes basqa aqparattar jarııalanýǵa jatpaıdy», delingen habarlamada.
Aıta keteıik, bıylǵy jyldyń basynan beri zańsyz maınıngtik fermalardy uıymdastyrýdyń 11 faktisi anyqtalǵan. Olardyń qylmystyq tabysynyń jalpy somasy 440 mıllıon teńgeni qurady. Tergeý barysynda 269 mıllıon teńge somasynda maınıngtik jabdyqtary tárkilenip, 373 mıllıon teńge somasynda sıfrlyq aktıvter óndirilgen.
«Sotqa jiberilgen eki qylmystyq is boıynsha jalpy qylmystyq tabys 216 mıllıon teńgeni qurady. Osy ister sheńberinde 1,1 mıllıard teńgelik múlik pen 30 mln teńgeden astam sıfrlyq aktıvterge tárkilendi», dep naqtylady vedomstvo ókilderi.