1996 jyldyń 30 qarashasynda Qorǵanys mınıstrligi qurylymynda zań qyzmeti qurylǵan edi. Sol kezden beri bul kún jyl saıyn Áskerı zańgerler kúni retinde atap ótiledi.
Keıin kele ýaqyt talabyna saı ári Qarýly kúshterdiń damýyna oraı áskerı zań qyzmeti de ózgeriske ushyrap otyrdy. Al 2004 jyly Zań departamenti qurylyp, Qorǵanys mınıstrliginiń derbes bólinisine aınaldy. Onyń negizgi mindeti – Qarýly kúshterdegi zań qyzmetteri jumysyn úılestirý.
Departament zańgeri, ádilet maıory Almat Smaǵulovtyń aıtýynsha, kez kelgen zań qyzmeti sekildi áskerı salanyń Zań departamenti de óz jumysynda eń aldymen, Ata zańdy basshylyqqa alady. Sonymen qatar zańdar, Prezıdent pen Úkimet aktileri, ózge de normatıvtik-quqyqtyq aktilerge súıenip qyzmetin júrgizedi.
«Áskerı zań qyzmeti Qarýly kúshterdegi ulttyq zańnamanyń saqtalýyna, sondaı-aq memlekettik saıasatty iske asyrýdy quqyqtyq turǵydan qamtamasyz etýge baǵyttalǵan. Qazirgi tańda ol Qarýly kúshterdegi ózindik ishki qurylymy bar birtutas derbes organ retinde jumys isteıdi, úılestirý men esep berý qaǵıdalaryna negizdelgen», deıdi ol.
Áskerı zańgerler qorǵanys jáne áskerı qyzmet salasyndaǵy normatıvtik-quqyqtyq bazany qalyptastyrýǵa, zańnamalyq jáne zańǵa baǵynyshty aktiler jobasyn daıyndaýǵa belsendi atsalysady. Sonymen qatar áskerı qyzmet ótkerý men áskerı qyzmetshilerdi áleýmettik qorǵaý máseleleri jónindegi quqyqtyq aktilerdi ázirleıdi.
«Jalpy aıtqanda, biz, zańgerler, áskerı saladaǵy quqyqtyq qatynastardyń paıda bolýynan bastap olardyń saqtalýy men oryndalýyna deıingi quqyq normalaryn qalyptasyrýdyń barlyq kezeńine tikeleı aralasamyz. Qarýly kúshter qyzmetiniń ár baǵytynda ári basqarý deńgeıleriniń barlyǵynda áskerı zań qyzmeti mamandarynyń is-áreketin úılestiremiz», deıdi Almat Ermekuly.
Tarqatyp aıtar bolsaq, Qorǵanys mınıstrliginiń Zań departamenti saladaǵy zańnamanyń saqtalýyn, ázirlenip jatqan quqyqtyq akti jobalarynyń qoldanystaǵy zańnamaǵa sáıkestigin qamtamasyz etý, elimizdiń zańdaryndaǵy Qorǵanys mınıstrliginiń quzyretine kiretin máselelerdi túsindirý, normatıvtik-quqyqtyq aktilerdi, kelisimsharttardy, prosessýaldyq qujattar men basqa da zańdyq kúshi bar qujattardy daıyndaý jumysymen aınalysady.
Sonymen qatar sot organdarynda sala múddesin qorǵaý da – áskerı zańgerdiń basty mindetiniń biri. Kún saıyn olar Qorǵanys mınıstrligi men Qarýly kúshter atynan sot otyrystaryna qatysyp, daýlardy sotqa deıin retteýge, QM mekemeleri men áskerı bólimderi atynan talap-aryzdardy engizýge, tıisti negiz bolǵan jaǵdaıda qorǵanys salasy paıdasyna sheshilmegen sot aktilerine shaǵym túsirýge muryndyq bolady.
Ádilet maıory A.Smaǵulovtyń aıtýynsha, 2015 jyldyń qyrkúıek aıynan osy qyzmetke kiriskeli beri 9 jyldyń ishinde túrli jaǵdaıdy bastan ótkergen. Ásirese sot otyrystarynda Qarýly kúshterdiń múddesin qorǵaý barysynda ártúrli jaıttar oryn alatynyn aıtady.
«Keıde sondaı sátterde qarsy taraptyń ýájine qarsy dálel aıtyp, pikir talastyrýdan bólek, ózińniń ishki emosııańmen de kúresýge týra keledi. Keıbir otyrystar óte tartysty da qyzý ótedi. Mundaıda artyq aýyz sóz ben minezdi jıystyryp, barynsha dáleldi ári salmaqty sóıleýge tyrysamyz», deıdi ol.