Búgin Úkimet otyrysynda aýyl mektepterin damytý máseleleri qaraldy, dep jazady Egemen.kz.
Oqý-aǵartý mınıstri Ǵanı Beısembaevtyń aıtýynsha, Aqtóbe oblysynda «Sıfrlyq tehnologııalardy paıdalana otyryp, aýyl mektepteriniń áleýetin arttyrý» jobasy tabysty iske asyrylyp otyr.
Jobaǵa 12 tirek jáne 134 shaǵyn jınaqty mektep, 11 myńnan astam bilim alýshy men 3,5 myńǵa jýyq pedagog qatysqan. «Tirek mektep – shaǵyn jınaqty mektep» bilim berý modeli tıimdi ekeni anyqtalǵan.
Bul bilim berý modeli tirek mektepterdiń bilim berý úderisiniń joǵary kórsetkishteri esebinen shaǵyn oqý oryndarynda oqytýdyń qoljetimdiligi men sapasyn arttyrmaq.
Oqý-aǵartý mınıstrligi usynylǵan modeldi elimiz boıynsha keń qoldanýdy usyndy.
«Ol úshin ákimderge barlyq aýyldyq mektepterdiń materıaldyq-tehnıkalyq bazasyn jańartý, oqý oryndaryn joǵary jyldamdyqty ınternetpen qamtamasyz etý, sondaı-aq tirek mektepterdiń muǵalimderin yntalandyrý úshin qosymsha tólemder kózdeý qajet», dedi Ǵanı Beısembaev.
Bıyl jobaǵa Aqmola, Qostanaı, Pavlodar, Batys Qazaqstan jáne Soltústik Qazaqstan oblysyndaǵy 10 tirek jáne 30 shaǵyn jınaqty mektep tartylyp jatyr. 2025 jyldyń qańtarynan bastap jobaǵa 17 óńirdiń 192 tirek jáne 759 shaǵyn jınaqty mektebi qatysady. Al úshinshi kezeńde osy jobaǵa qalǵan shaǵyn jınaqty mektepterdiń barlyǵy qamtylady.