Jetisý oblysynda Alakól aýdandyq sotymen Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Alakól memlekettik qoryǵy» RMM basshysy Q. Ábilqasymov, onyń orynbasary N. Beısenov jáne bólim basshysy R. Shalapanov sottaldy, dep habarlaıdy Egemen.kz Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
Olar qyzmet kórsetiletin aýmaqta zańsyz shóp shabý boıynsha ákimshilik jaýapkershilikke tartpaǵany úshin jergilikti turǵyndardan aldyn ala sóz baılasý arqyly adamdar tobynda birneshe ret para alǵany úshin kináli dep tanylǵan.
«Abylqasymov pen Shalapanovtyń árqaısysyna 10,5 mln teńge, al Beısenovke 15,7 mln teńge kóleminde aıyppul salyndy. Osy úkimmen, Alakól aýdanynyń turǵyndary O. Býlgýnchınov pen K. Kanagatov atalmysh laýazymdy tulǵalarǵa para bergeni úshin sáıkesinshe 6 mln teńge jáne 2,2 mln teńge aıyppulǵa sottaldy», delingen habarlamada.
Sonymen qatar sottalǵandarǵa ómir boıy memlekettik qyzmette jáne kvazımemlekettik sektorda qyzmet atqarýǵa tyıym salyndy.
Sot úkimi zańdy kúshine endi.