Jylytý maýsymynyń bastalýyna oraı órt qaýipsizdigin qadaǵalaý is-sharalary jalǵasyp jatyr. Sonyń biri – gaz qaýipsizdigi talaptaryn saqtaýǵa baǵyttalǵan «Sizdiń úıińizdiń qaýipsizdigi» atty aksııa. Keıingi jyldary Qaraǵandy oblysyndaǵy Temirtaý qalasyn gazdandyrý isi qarqyn alýymen, jergilikti turǵyndardy tabıǵı kógildir otyndy paıdalaný erejelerin saqtaýǵa úndeý, úgit-nasıhat jumysy da jıiledi.
Jýyrda aýmaqtyq Tótenshe jaǵdaılar basqarmasynyń qyzmetkerleri «QazaqGaz Aimaq» AQ Qaraǵandy óndiristik fılıaly ókilderimen birlesip jeke turǵyn úı sektorlarynda reıdtik is-sharalar ótkizdi. Temirtaý gaz sharýashylyǵyna arnaıy at basyn burǵanda Alekseı Grıshenko esimdi azamatpen tanystyq. Ol ózin apattyq jumystar slesarimin dep tanystyrdy.
Qazaqshaǵa sýdaı gaz mamanymen áńgimemiz jarasa ketti. Alekseı óziniń kúndelikti jumysy qala halqyn apatsyz ári úzilissiz gazben qamtýmen baılanysty ekenin aıtyp, qyzmet úderisin túsindire bastady. Qalaǵa gaz berýde qate qadam jasaýǵa bolmaıtynyn, óte muqııat qadaǵalaý kerek ekenin qaıtalaǵan ol: «Ár istiń ózindik ereksheligi bar. Qaýipsizdik tehnıkasyn qatań saqtaý jáne tótenshe jaǵdaılardy boldyrmaý úlken jaýapkershilikti talap etedi. Sonymen qatar keıde fızıkalyq ári psıhologııalyq tózimdilik qajet bolady», dedi.
Shyn máninde bútindeı bir qalanyń, eldi mekenniń tynyshtyǵy men qaýipsizdigin qamtamasyz etetin úlken qyzmet shebinde júrgen jumysshy mamandarymyzdy elep-eskermeı jatatynymyz bar. Biz munyń bárin ózinen-ózi bolyp jatqandaı qabyldaımyz. Al rasynda gaz qaýipsizdigin saqtaýdyń artynda Alekseı Grıshenko sekildi qarapaıym myńdaǵan maman turǵany belgili. Prezıdentimiz Qasym-Jomart Toqaevtyń 2025 jyldy «Jumysshy mamandyqtar jyly» dep jarııalaýy osyndaı kózge kórine bermeıtin, alaıda orasan zor jaýapkershilik arqalaǵan, sondaı-aq óz isin qaltqysyz oryndap júrgen ári ony maqtan tutatyn kásip ıeleriniń mártebesin ósirýge septigin tıgizedi degen senim mol.
«Halyqqa qyzmet etý, adamdarǵa barymdy sala kómek kórsetý, qaýipsizdik pen jaılylyqty qamtamasyz etý maǵan shabyt beredi. Eger ómirde taǵy bir múmkindik berilse, gaz salasyn odan ári tereńdetip oqyp, dál osy jumysyma qaıta oralatyn edim. Bul mamandyqty tańdaýyma qyzyǵýshylyǵym sebepshi boldy. Tehnıkalyq salanyń mańyzdy ári jaýapkershiligi joǵary ekenin jete túsindim ári osy baǵytta árqashan alǵa qaraı damı berýdi qalaımyn. Jalpy, jumysshy mamandyǵyna qurmet – kez kelgen eńbekti baǵalaý, eńbektiń adam ómirindegi mańyzyn túsiný dep bilemin. Qandaı sala bolsyn, adamnyń qyzmetine degen adaldyǵyn taný – eń mańyzdy dúnıe», deıdi gaz mamany.
Kúni-túni qyraǵy kúzettegi, keıde óz ómirin qaterge tigetin A.Grıshenko qaýipsizdik jaıyna keńinen toqtaldy.
«Gaz paıdalanýda nemquraıdylyqqa jol berý aýyr zardaptarǵa, sonyń ishinde jarylystarǵa, ýlanýǵa, basqa da ómirge qaýipti jaǵdaıǵa ákep soǵady. Áli de qaýipsizdik máselesine saqtyqpen qaramaıtyn turǵyndarymyz jeterlik. Esimde qalǵan bir oqıǵa bar. Gaz júıesinde aqaý bolyp, turǵyn úıde gazdyń aýaǵa taralyp jatqany týraly aqparat kelip túsken edi. Jaǵdaı óte qaýipti, jarylys bolýy ábden múmkin. Biz komandamen jedel túrde oqıǵa ornyna jetip, eń aldymen, turǵyndardy qaýipsiz jerge shyǵardyq. Kóp kidirýge bolmaıtyn. Jaǵdaı jyldam qımyl men batyl áreketti, jaýapkershilik pen kásibılikti qajet etti. Gazdyń qaıdan taralyp jatqanyn lezde anyqtap, júıeni shapshań óshirdik. Boıyńdy úreı men úmit qatar bıleıtin sondaı sátter bizdiń jumysta az emes. Árıne, ár istiń óz qıyndyǵymen qatar, janǵa jaǵymdy tustary da bar. Sol kúngi turǵyndardyń alǵysyn estigende óz qyzmetimniń jaýapkershiligi men mártebesin anyq sezinip, marqaıyp qaldym», deıdi slesar.
Úlkenge qurmet, kishige izet tanytyp, jastarǵa eńbekke jaýapkershilikpen qaraýdy, kez kelgen isti adal atqarýdy, óz isiniń kásibı mamany bolýǵa umtylýdy úıretýden jalyqpaıtyn A.Grıshenkony adamı qasıeti úshin de ujymda áriptesteri joǵary qurmetteıdi.
«Jumys barysynda tájirıbesi az jastarǵa qaýipsizdik sharalaryn saqtaý men toptyq jumystyń mańyzyn túsindiremin. О́z basym óskeleń urpaqqa, olardyń jarqyn bolashaǵyna senemin», deıdi ol.
Ásirese ol kópshil, keńpeıil qasıeti qazaq baýyrlardan sińgen dep esepteıdi. О́ıtkeni ulty orys bolsa da, qazaq aýylynda ósip, qazaqsha til syndyrǵandyqtan, dúnıetanymy men kózqaras-paıymy da qazaqı ekenin maqtan tutady.
«Memlekettik tilge degen qurmetim meni úlken maqsatqa jeteleıdi. Osy elde týyp, ómir súrip jatqandyqtan jergilikti halyqtyń tilin bilip, dástúrin syılaý – qarapaıym ǵana ómir zańy. Iá, qazaqı ortada óskenim meniń oı-sanama áser etti. Qonaqjaılylyq, úlkenderdi qurmetteý, baýyrmaldyq sııaqty qundylyqtardy bala kezden boıyma sińirdim. Otbasymyzda dombyra shertetinder bar, al qazaqsha án aıtýdy bárimiz jaqsy kóremiz. Qazaq halqynyń keńpeıildiligi men darqan kóńili – úlgi alarlyq qasıet. Sondyqtan da elimizdiń kópultty memleket bolýy – yntymaq pen tatýlyqtyń aıqyn kórinisi dep bilemin», dep aǵynan jaryldy.