Ult óneriniń altyn uıasy Ahmet Jubanov atyndaǵy daryndy balalarǵa arnalǵan respýblıkalyq qazaq mamandandyrylǵan mýzykalyq mektep-ınternatynyń qurylǵanyna bıyl 60 jyl tolyp otyr. Ataýly kúnge oraı «Almaty Theatre» sahnasynda mekteptiń rýhanı áleýetin, daryndy balalardyń sheberligin kórsetken konsert uıymdastyrylyp, saltanatty jıynǵa Mádenıet jáne aqparat mınıstri Aıda Balaeva, belgili óner qaıratkerleri men mádenıet salasynyń maıtalmandary, daryndy balalar mektebiniń ár jylǵy túlekteri qatysty.
Ulttyń birtýar perzenti Ahmet Jubanov elimizdiń túkpir-túkpirin aralap júrip, qarapaıym qazaq otbasylarynda ónerge qushtar, biraq úırenýge múmkindigi joq jas talanttardy jıi kezdestiredi. Dál osy sátte óner janashyryna mýzykalyq mektep ashý týraly oı keledi. Almaty qalasynda respýblıkalyq qazaq mýzykalyq mektep-ınternatyn ashý týraly Mınıstrler Keńesiniń 1964 jylǵy №495 buıryǵy shyǵyp, mektep óz jumysyn bastaıdy. Osy jyly maýsym aıynda mektep dırektory qyzmetine Túrkistan Maqsutuly О́zbekov taǵaıyndalady.
Uly maqsat jolyndaǵy alǵashqy qadamdar, úlken jetistikterge jol ashqan ulaǵatty ustazdar mýzykalyq mekteptiń óz dástúrin qalyptastyrdy. Mektep esigin ashqannan bastap jumysqa kirisken ustazdar aýyl balalaryna mýzyka aspaptarynyń qyr-syryn úıretip, ıgi ister men ıdeıalardyń, jańa bastamalardyń negizin saldy. Qazirgi tańda sol aǵa býyn ókilderiniń eren eńbegi men mańdaı teri aqtaldy.
Qazaq óneriniń irgeli ordasy sanalatyn taǵylymy mol tarıhı bilim ordasynyń mereıtoıymen quttyqtap kelgen Mádenıet jáne aqparat mınıstri Aıda Balaeva Memleket basshysy Qasym-Jomart Toqaevtyń joldaǵan jyly lebizin jetkizdi. «Ahmet Jubanov atyndaǵy daryndy balalarǵa arnalǵan respýblıkalyq mamandandyrylǵan qazaq mýzykalyq mektep-ınternatynyń qurylǵanyna 60 jyl tolýymen quttyqtaımyn. Halqymyzdyń uly perzenti A.Jubanovtyń bastamasymen ashylǵan bilim ordasy búginde daryndy balalardy tárbıeleýdiń ózindik dástúrin qalyptastyrǵan irgeli oqý ornyna aınaldy. Kıeli shańyraqtyń ulaǵatty ustazdary ult rýhanııatyn órkendetýde ólsheýsiz úles qosyp keledi. Mektep ujymy talantty jastardy ónerge baýlyp, urpaqtyń boıyna rýhanı qundylyqtardy darytýǵa zor eńbek sińirdi. Internat túlekteri Qazaqstanda ǵana emes, shetelderde, áıgili sahnalarda óner kórsetip, tól mádenıetimizdi dáripteýge belsendi atsalysyp júr. Túrli baıqaýda top jaryp, halqymyzdyń mereıin asyrǵan shákirtterińizdi búkil elimiz maqtan tutady. Sizderge qazaqtyń mýzyka ónerin damytý jolyndaǵy eseli eńbekterińiz úshin zor rızashylyǵymdy bildiremin», degen Prezıdent quttyqtaý hatynda.
Memleket basshysynyń quttyqtaýyna sabaqtastyra mınıstrlik tarapynan jasalyp jatqan naqty qoldaý men qamqorlyqty atap ótken Aıda Balaeva óz oıyn bylaı jalǵady: «Ahmet Jubanov atyndaǵy mektep – ult óneriniń ustahanasy. 60 jyl boıy bilim ordasy ulttyq jáne álemdik mýzyka óneriniń maıtalmandaryn tárbıelep, ultymyzdyń rýhanı murasyn baıytyp keledi. Mektep túlekteri elimizdiń abyroıyn halyqaralyq deńgeıde asqaqtatyp, óner salasynda bıik belesterdi baǵyndyryp júr. Bul – A.Jubanovtyń qazaq balalaryn álem sahnalarynda kórsem degen uly armanyn, bizge artqan asqaq amanatynyń oryndalǵanynyń bir kórinisi dep bilemin. Osyndaı nátıjege jetýde eń aldymen ustazdardyń eńbegin erekshe atap ótkim keledi», dep shákirtterine óner áleminde ózindik jol tabýyna zor úles qosyp júrgen birqatar ustazdardy Mádenıet jáne aqparat mınıstrliginiń «Mádenıet salasynyń úzdigi» tósbelgisimen marapattady. Marapattalǵandar qatarynda Gúljan Senbıeva, Baǵdat Júnisov, Gaýhar Beısembaeva, Gúljamılá Muhametjanova, Gúlnarıam Rysdáýletova, Irına Bardashova, Maıra Mendiǵalıeva, Ásel Tashımova, Mádına Shegirova, Jánııa Akbarova, Dáýren Sembaev, Gúlnaz Býlaeva, Dınara Asqarova, Aıjan Ospanova sekildi mýzykalyq mekteptiń fortepıano, ishekti aspaptar, úrmeli aspaptar, halyq aspaptary, mýzyka teorııasynan bilim beretin ustazdar bar.
Mınıstr keıingi jyldary pedagogterdiń qajyrly eńbeginiń arqasynda 200-den asa oqýshynyń respýblıkalyq, halyqaralyq baıqaýlardyń laýreaty men dıplomanttary atanǵanyn atap ótti. Mereıtoıǵa oraı mekteptiń birqatar pedagogi memlekettik nagradalarmen marapattalǵanyn, sondaı-aq bıyl mınıstrliktiń qoldaýymen mekteptiń materıaldyq-tehnıkalyq bazasynyń jańartylǵanyn da qýanyshpen habarlady. Aıda Ǵalymqyzy aldaǵy ýaqytta da mekteptiń órkendeýine memleket tarapynan qoldaýdyń jalǵasa beretinine sendirdi.
Konserttik baǵdarlamada mekteptiń halyq aspaptar orkestri, úrmeli jáne urmaly aspaptar orkestri, kameralyq orkestr, qobyzshylar ansambli oryndaǵan K.Ázirbaevtyń «Kóksholaq», Qurmanǵazynyń «Saryarqa», A.Jubanovtyń «Tájik bıi», N.Tilendıevtiń «Mahambet», A.Bestibaevtyń «Azııa daýysy», Dáýletkereıdiń «Kóruǵly», A.Jubanovtyń «Qarlyǵash» shyǵarmalary ónersúıer qaýymdy súısintti.
ALMATY