Búgin Memlekettik qyzmet isteri agenttiginde BAQ men medıa salasynyń ókilderi úshin baspasóz týry uıymdastyryldy. Oǵan 50-ge jýyq qazaq kórkemsóziniń korıfeıleri, elektrondy jáne baspa BAQ, telearnalar men medıa ókilderi qatysty, dep habarlaıdy Egemen.kz.
Kezdesý barysynda Darhan Jazyqbaı qatysýshylarǵa memlekettik qyzmetshilerdiń qajetti daǵdylary men quzyretterin jetildirý úshin barlyq jaǵdaılar jasalǵanyna toqtalyp, memlekettik qyzmetke kirýdi jeńildetý jáne kásibı mamandardy tartý maqsatynda engizilgen zańnamalyq bastamalardy júzege asyrýdyń tıimdiligi týraly aıtty.
Ol memlekettik qyzmetshilerdiń qoǵam aldyndaǵy jaýapkershiligin jáne osyǵan baılanysty olardyń ádeptilik minez-qulyqtyń joǵary standarttaryn saqtaýy, kommýnıkasııalyq daǵdylaryn únemi damytýy mańyzdy ekenine erekshe nazar aýdardy.
«Memleket basshysy bıylǵy Joldaýynda «Halyq únine qulaq asatyn memleket» tujyrymdamasyn usynǵaly qoǵam men bılik qurylymdary arasyndaǵy qarym-qatynas mádenıetin ózgergenin atap ótti. Memleket pen qoǵam arasyndaǵy dıalogtyń sapasyn odan ári arttyra túsý úshin adal ári ádil bolýymyz, tek zań aıasynda áreket etýimiz, bergen ýádemiz ben isimiz úshin jaýap bere bilýimiz kerek ekenin alǵa qoıdy. Bul aıtylǵan mindetter memlekettik qyzmetshilerdiń rýhanı-adamgershilik áleýetin jetildirýdi jáne adamı qundylyqtarǵa bastaıtyn «Ádiletti Qazaqstan – Adal azamat» ıdeıasyn olardyń sanasyna ornyqtyrýdy talap etedi», dedi Agenttik tóraǵasy.
Darhan Jazyqbaı memlekettik qyzmettiń gıbrıdti modeli negizinde memlekettik apparatty kásibılendirý, personaldy beıimdeý, turaqtandyrý jáne yntalandyrý boıynsha HR-prosesterdi jetildirý, servıstik jáne adamǵa baǵdarlaný qaǵıdattaryn ilgeriletýge baǵyttalǵan josparlarmen bólisti. Bul sharalar memlekettik qyzmetti damytýdyń 2024-2029 jyldarǵa arnalǵan jańa tujyrymdamasynda josparlanǵan jáne Agenttik olardy iske asyrý boıynsha belsendi jumys júrgizýde.
Sondaı-aq Agenttik ókilderi memlekettik qyzmetke irikteý jáne ony ótkerý, memlekettik kórsetiletin qyzmetter sapasyn arttyrý, memlekettik apparat qyzmetin bıýrokratııadan aryltý salasyndaǵy negizgi jetistikteri týraly aqparat usyndy.
Baspasóz týry barysynda memlekettik qyzmetke onlaın irikteýdi júrgizýge múmkindik beretin «eQyzmet» syrtqy portalynyń jumysy tanystyryldy. Sondaı-aq atalǵan júıede memlekettik qyzmetshilerdiń úlken derekter bazasy shoǵyrlanǵan, al sıfrlyq tehnologııalardy qoldaný berilgen parametrler boıynsha (bilim, daǵdylar, quzyretter jáne ózge de derekter) qatardaǵy memlekettik qyzmetshiler arasynda qandaı da bir laýazymǵa neǵurlym cáıkes keletin kandıdattardy tańdaýǵa múmkindik beredi.
Is-sharaǵa qatysýshylar memlekettik qyzmetshilerdiń kommýnıkatıvtik daǵdylaryn jetildirýge arnalǵan medıa-ortalyq, Agenttik pen Prezıdent janyndaǵy Memlekettik basqarý akademııasynyń tarıhı murajaıy, sıfrlyq kovorkıng-zaly, kitaphana jumysymen tanysty.
Sonymen qatar, «Jańa formasııa basshysy» memlekettik saıası qyzmetshilerge arnalǵan kýrstarda oqýdyń qalaı ótkiziletindigin kórdi. Jańa formasııa basshylary úshin ádildik, ashyqtyq, memleketshildik jáne halyqqa adal qyzmet etý qaǵıdattaryn saqtaýdyń mańyzdylyǵyna basymdylyq beriledi. Qaıta daıarlaý baǵdarlamasyn iske asyrý jahandyq paıymdaý, strategııalyq oılaý jáne kóshbasshylyq syndy quzyretterdi qalyptastyrýǵa jáne damytýǵa baǵyttalǵan.
BAQ jáne medıa ókilderi Agenttik tóraǵasyna memlekettik qyzmetti odan ári damytýǵa qatysty birqatar suraqtar qoıyp, óz pikirleri men usynystaryn ortaǵa saldy.
Darhan Jazyqbaı Memleket basshysynyń «adam memleket úshin emes, memleket adam úshin» qaǵıdatyn iske asyrýda memlekettik organdardyń BAQ ókilderi jáne azamattyq qoǵammen syndarly dıalog qurýynyń mańyzdylyǵyn atap ótip, qatysýshylardy belsendi yntymaqtastyqqa shaqyrdy.