Atalǵan kúnge oraı Mádenıet jáne aqparat mınıstri Aıda Balaeva eriktilerdi quttyqtap, Facebook paraqshasynda jazba arnady, dep habarlaıdy Egemen.kz.
1985 jyly Birikken Ulttar Uıymy tarapynan bekitilgen «Volonterler kúni» 5 jeltoqsanda álem boıynsha atap ótiledi.
«Bul kún – meıirimdilik pen súıispenshiliktiń, tilektestik pen jaýapkershiliktiń ozyq úlgisin kórsetip, ózgege qol ushyn beretin izgi jandardyń merekesi. Keıingi on bes jylda elimizde volonterlik qozǵalys qarqyn alyp, jalpyhalyqtyq sıpat aldy. Prezıdenttiń memlekettik qoldaý sharalaryn kúsheıtý men volonterlikti yntalandyrýǵa baǵyttalǵan bastamalary bul salany damytýǵa úlken serpin berdi», dep jazdy mınıstr.
Eske salaıyq, 2020 jyl Qazaqstanda «Volonterler jyly» dep jarııalandy. 2024-2026 jyldarǵa arnalǵan volonterlikti damytý jáne qoldaý jónindegi jańa Jol kartasy bekitildi.
Mınıstr jazbasynda Memleket basshysynyń bastamasymen BUU Bas Assambleıasy 2026 jyldy «Ornyqty damý maqsatynda halyqaralyq eriktiler jyly» dep jarııalaǵan qarardy qabyldaǵanyn, Memlekettik organdar jyl saıyn volonterlik qaýymdastyqpen birlesip, ekologııa, áleýmettik jáne mádenı salalar, densaýlyq saqtaý, tótenshe jaǵdaılar, sport jáne basqa da baǵyttar boıynsha 50-den astam jobany iske asyrǵanyna toqtalǵan.
«Qazaqstanda volonterlik uıymdardyń sany turaqty túrde ósip keledi. 2020 jyldan beri olardyń sany úsh ese artyp, 740-qa jetti. Belsendi volonterler sany 5 ese ósip, 132 myń adamǵa jetti. Sondaı-aq, 1 800-den astam bastamashyl volonterlik top jumys isteıdi. 2024 jyldyń alǵashqy jartyjyldyǵynda 65 myńǵa jýyq is-shara men aksııa ótkizilip, 132 myńnan astam otandastarymyzdy qamtydy. 680 myń adamǵa kómek kórsetildi. Jyl sońyna deıin bul kórsetkish áli de kóptegen ıgilikti istermen tolyǵary anyq», dep jazǵan Aıda Balaeva.
Mınıstrdiń sózinshe Qazaqstan Halyqaralyq qaıyrymdylyq reıtınginde 119 eldiń ishinde 40-shy orynǵa kóterildi. Bul – patrıotızmniń, qaıyrymdylyq pen qamqorlyqtyń jarqyn kórinisi bolǵan volonterlerdiń el úshin atqarǵan eren eńbeginiń laıyqty nátıjesi.