Keshe Astana qalasy Abaı qonaq úıiniń májilis zalynda «Uly Dala Qyrandary» áleýmettik-mádenı qozǵalysynyń uıymdastyrýymen baspasóz máslıhaty ótti. Onda atalmysh qozǵalystyń bastamasymen ústimizdegi jyldyń 3-7 mamyry aralyǵynda «Almaty – Taldyqorǵan – Aıagóz – Aqjar» baǵyty boıynsha ótkeli otyrǵan «Birligi myqty el ozady» atty sherýdiń jaı-japsary sóz boldy.
Tarıhshylar, sherýdi uıymdastyrýshylar jáne BAQ ókilderi qatysqan jıynda Qazaq handyǵynyń 550 jyldyǵy aıasynda qolǵa alynǵan sharanyń mán-mańyzy, maqsat-múddesi keńinen talqylandy. Sondaı-aq, «Uly Dala Qyrandary» qozǵalysynyń teń tóraǵasy Sádibek Túgel sherý barysynda jurtshylyqqa usynylatyn mádenı is-sharalar jóninde habardar etti. Onyń aıtýynsha, Shyǵys Qazaqstan oblysy Tarbaǵataı aýdany Aqjar aýylynda Qabanbaı batyrdyń týyn ustaǵan, el qorǵaǵan Er Dáýletbaı batyrǵa arnap eskertkish turǵyzylmaq. Budan bólek, ǵylymı-praktıkalyq konferensııa, aqyndar aıtysy, alaman báıge el nazaryna usynylady dep kútilýde.
Taǵy bir aıta keter jaıt, baspasóz máslıhaty sońynda qoǵamdyq túrli máseleler men ulttyq sport salasyna qatysty jazylǵan birqatar jańa kitaptar tanystyryldy.
Joldybaı BAZAR,
«Egemen Qazaqstan».