Prezıdent Qasym-Jomart Toqaevtyń Aqtóbe oblysyna jumys sapary «Bolashaq» shahtasyn aralap kórýden bastaldy. Shahtanyń qýattylyǵy jylyna 7,5 mıllıon tonna hrom rýdasyn óndirýge jetedi, dep habarlaıdy Egemen.kz.
Memleket basshysyna jańa nysanda 1800 jumys orny qurylatyny jóninde málimet berildi. Tartylatyn ınvestısııa kólemi 1 trıllıon teńgeden asady.
Eurasian Resources Group dırektorlar keńesiniń tóraǵasy Shýhrat Ibragımov «Bolashaq» shahtasy ERG kompanııalar tobynyń iri ınvestısııalyq jobalarynyń biri sanalatynyn atap ótti.
Kásiporyn «Mıllıonnoe» jáne «Almas-Jemchýjına» ken oryndaryn ıgerýmen aınalysady. Ken qazý isine avtomatty rejımde burǵylaıtyn ıntellektýaldy burǵylaý qondyrǵysy, qashyqtan jer ústinde basqarý júıesi, sondaı-aq tolyqtaı avtomattandyrylǵan júk kóterý mashınalary sekildi ozyq tehnologııalar men zamanaýı qural-jabdyqtar qoldanylady.
Kompanııa basshysynyń aıtýynsha, Dóń taý-ken baıytý kombınatyna qarasty «Bolashaq» shahtasyn iske qosý elimizdiń taý-ken ónerkásibindegi tarıhı oqıǵa bolmaq.