Jyl sońyna taman turǵyn úı naryǵyndaǵy baǵa deńgeıinde ózgeris boldy. Árıne, ár naryqtaǵy jaǵdaı ártúrli. Máselen, Almatyda sońǵy 6 aıdaǵy úzdiksiz ósimnen keıin jaıly turǵyn úılerdiń jalǵa alý aqysy 1 paıyzǵa tómendegen. Buǵan birneshe ret bolǵan jer silkinisi sebep bolýy múmkin deıdi sarapshylar. Osy oraıda Ulttyq statıstıka bıýrosy usynǵan málimetterge de nazar aýdaraıyq. Statıstıka boıynsha, baspana naryǵynyń barlyq segmenti qarashada birdeı ósim (0,4 paıyzǵa) kórsetken.
Bıyl qarasha aıynda jyljymaıtyn múlik naryǵy oń dınamıkasymen erekshelendi. Jaıly turǵyn úılerdiń qaıta satylymy aılyq 0,4 paıyz ósim kórsetken. Satylym byltyrmen salystyrǵanda 3,2 paıyzǵa kóbeıgen. Ortasha baǵa – sharshy metrine 511,7 myń teńge (qazanda – 509,4 myń teńge).
Jańa úılerdiń satylymy da aılyq 0,4 paıyzǵa ósken. Jyldyq 3,4 paıyzǵa ósken. Ortasha baǵasy – sharshy metrine 499,2 myń teńge (qazanda – 4,5 myń teńge).
Jaıly turǵyn úılerdi jalǵa berý aqysy aılyq 0,4 paıyzǵa ósken. Jyldyq 6,0 paıyzǵa artqan. Ortasha baǵasy – sharshy metrine 4,5 myń teńge (qazanda – 4,5 myń teńge).
Arendalyq turǵyn úı baǵasy ortasha alǵanda segizinshi aı qatarynan qymbattady, biraq aılyq ósim dınamıkasy baıaýlaǵan.
Turǵyn úı jyljymaıtyn múlik naryǵyndaǵy jınaqtalǵan baǵa ósimin 2022 jyldyń qańtary men 2024 jyldyń qarashasy aralyǵyndaǵy tutynýshylyq ınflıasııamen salystyrsaq, bastapqy turǵyn úı – 20,6 paıyzǵa, qaıtalama turǵyn úı – 17,9 paıyzǵa, jalǵa beriletin turǵyn úı – 48,4 paıyzǵa, tutynýshylyq ınflıasııa 42,4 paıyzǵa ósken.
«Arendalyq turǵyn úı ortasha baǵasynyń jınaqtalǵan ósimi 2022 jyldyń qańtarynan bergi jınaqtalǵan ınflıasııany qýyp jetti. Bul – aqyly qyzmetterdiń qymbattaýynyń áseri. Qazir bastapqy jáne qaıtalama naryqtaǵy baǵa ınflıasııadan aıtarlyqtaı qalyp kele jatyr», delingen bıýro málimdemesinde.
«Qazaqstandaǵy jańa jáne qaıtalama turǵyn úı baǵasy suranysqa aıtarlyqtaı táýeldi ekenin taǵy da eske salǵym keledi, ony memleket memlekettik ıpotekalyq baǵdarlamalar («Otbasy bank», «Ulttyq bank», BJZQ) arqyly yntalandyrady. 2021 jyly biz BJZQ áseriniń ájeptáýir bolǵanyn baıqadyq. Sonyń saldarynan sońǵy jyldary shekteý sharalary engizile bastady», deıdi «Tengenomika» sarapshylary.
Telegramdaǵy «Kommentarıı» kanalynyń jazýynsha, turǵyn úı naryǵy birtindep ımpýls alyp kele jatyr (BJZQ-dan aýdarym kóleminiń artqanyn eskersek). «Bul qaıtalama naryqqa paıdaly. Ipotekaǵa qatysty mámilelerdiń sıfrlaryn kútý kerek. Degenmen jyljymaıtyn múlik quny 2023 jyldan beri quldyraýda» deıdi avtorlar.
«ArtFinanz» arnasynyń paıymdaýynsha, suranystyń ózgerýi naryqta birqatar saldardy týǵyzady.
«Krisha» saıtyna qaraıtyn bolsaq, Almatyda – 37 myń páter, Astanada 35 myń páter satylyp jatyr. Halyq sanynyń az ekenine qaramastan Astanada satylyp jatqan páter kólemi Almatymen teńese jazdap tur. Qatelesýim de múmkin, biraq kóktemge taman satyp alý-satý boıynsha mámile kóp bolatyn sekildi. Platformada keıbir úıler men páterlerdiń baǵasy jyl boıy ózgerissiz tur. Tipti keıbiriniń baǵasy tómendetilgen. Inflıasııany esepke alatyn bolsaq, turǵyn úı arzandap jatyr deýge bolady. Meniń braýzerimde jyldar boıy saqtalyp turǵan ondaǵan nysannyń habarlamasy bar papka qurylǵan. Jınaqtalǵan ınflıasııa 20 paıyzdan asyp ketti, al olar bolsa áli eski baǵamen tur. Onyń sebepteri ár alýan. Birinshiden, halyqtyń naqty tabysy tym baıaý ósip jatyr. Ekinshiden, ıpoteka arnasy tarylyp ketti. Bul bir jaǵynan durys ta, óıtkeni qazir jeńildetilgen ıpotekalardy iske qossa, onda baspana baǵasy sharyqtap ketedi, sóıtip, ol óz kezeginde ınflıasııany da arttyrady. Úshinshiden, qazir jyljymaıtyn múlik baǵasy joǵarylatyp qoıylǵan. BJZQ-dan aqsha aýdarý iske asyrylǵannan keıin birqatar óńir men segmentte baǵa eki ese ósip ketti. Al qurylysshylar tarapynan shyǵyndardyń ashyqtyǵyn biz sol kúıi kóre almadyq. Tórtinshiden, baǵanyń basty qozǵaltqyshy sanalatyn memleket qazir turǵyn úı emes, ınfraqurylymdyq jobalarǵa basymdyq berip otyr. Bul qısynǵa keledi, óıtkeni adamdarda jumys pen aqsha bolsa, onda baspanaǵa degen suranys ta ózdiginen artady», deıdi sarapshy.