Osy oraıda Sý resýrstary jáne ırrıgasııa mınıstrligi QR Ǵylym jáne joǵary bilim mınıstrligimen kelisim jasady, dep habarlaıdy Egemen.kz.
Kelesi jyly mınıstrliktiń eki qyzmetkeri Amerıka Qurama Shtattarynda oqý taǵylymdamasynan ótedi. Taǵy bir maman «Bolashaq» baǵdarlamasy boıynsha Aýstralııada bilim alady.
Eske salaıyq, Sý resýrstary jáne ırrıgasııa mınıstrliginiń bastamasy boıynsha bıyl «Bolashaq» baǵdarlamasyna «Gıdrogeologııa», «Sý resýrstary» sekildi oqý baǵdarlamalary qosylǵan edi, nátıjesinde, atalǵan mamandyqtar boıynsha shetelde bilim alý múmkindigine ıe boldy.
Vedomstvo málimetinshe, mamandardyń biliktiligin arttyrý - mınıstrlik jumysynyń basym baǵyttarynyń biri.
«Búginde vedomstvo Qytaı, Nıderlandy, Fransııa syndy memlekettermen jáne halyqaralyq uıymdarmen tájirıbe almasý jáne birlesip maman daıarlaý jóninde kelisim jasady. Bıyl Nıderlandy sarapshylary Astana, Aqtóbe qalalarynda sý tasqyny qaýpin basqarý boıynsha 3 márte oqý semınaryn ótkizdi. Nátıjesinde sý tasqynyna qarsy is-qımyl máselelerimen aınalysatyn 50-den astam maman biliktilik arttyrdy», dedi Sý resýrstary jáne ırrıgasııa birinshi vıse-mınıstri Bolat Beknııaz.
Taǵy bir aıta ketetin jaıt, «Qazsýshar» mamandary Japonııanyń Sapporo qalasynda úsh aılyq oqý kýrsyna qatysqan. Al Qyzylorda oblysy boıynsha «Qazsýshar» fılıaly dırektorynyń orynbasary Ońtústik Koreıaǵa baryp, tájirıbe almasyp qaıtty.