Almatynyń tańǵajaıyp tabıǵaty týrısterge taptyrmas qazyna. Ásirese qys aılarynda aq ulpa qarǵa oranǵan asqar Alataý tipti ajarlana túsedi. Tanymal ıtalıandyq «Condé Nast Traveller» jýrnaly Almaty týraly keń kólemdi materıal jarııalap, ásem shahardy Shyǵys pen Batys toǵysqan, dástúr men zamanaýı trendter úılesim tapqan meken dep sıpattady.
Álemniń ár buryshynan taý baýraıyndaǵy sulý qalanyń symbatyna súısine keletin týrıster sany jyl saıyn artyp keledi. Jýrnalǵa jarııalanǵan Lıýchııa Gallıdiń maqalasy men Djakomo Breseldiń fotosýretteri qala-ny baı mádenıet, tabıǵı sulýlyq, zamanaýı dınamıka úılesken erekshe saıahat baǵyty retinde pash etken. Avtor maqalada Almaty qalasy men Almaty oblysynda ornalasqan týrıstik oryndarǵa erekshe toqtalyp ótken. Ile Alataýynyń asqaq taýlary, Altynemel ulttyq parkiniń «án salatyn» qum tóbeleri, sý astyndaǵy ormanymen áıgili Qaıyńdy kóli, Kólsaı kólderi, biregeı Sharyn shatqaly saıahatshylar nazaryn aýdaratyny aıtylǵan. Sondaı-aq tarıhy baı shahardyń eski qala aımaǵyna jatatyn Panfılov kóshesi, Kók bazar, Kóktóbe sekildi kórikti oryndary da nazardan tys qalmaǵan.
«Jýrnal megapolıstiń gastronomııalyq baılyǵyn da erekshe atap ótedi. Dástúrli qazaq taǵamdarynan bastap, jergilikti ashanany neonomadtyq ınterpretasııada usynatyn zamanaýı meıramhanalarǵa deıin kórsetilgen. Almaty – maqalada máıekti mádenı murasymen, sándi sáýletimen, erekshe qonaqjaılylyǵymen shabyt izdeıtin ári jańa baǵyt ashýdy jany súıetin týrıster úshin tartylys ortalyǵy retinde beınelengen», deıdi Almaty ákimdiginiń baspasóz qyzmeti.
Álemdegi saıahat jáne týrızm týraly eń iri basylymdardyń birine jarııalanǵan aýqymdy maqala Almatynyń Ortalyq Azııadaǵy eń áleýetti týrıstik baǵyttardyń birine aınalyp, tabıǵı sulýlyǵy, mádenı áralýandyǵymen saıahatshylardy qyzyqtyryp kele jatqanyn taǵy bir dáleldeıdi.
Almatynyń tabıǵı erekshelikterinen bólek, elimizdiń mádenı ortalyǵy ekeni de materıalda keńinen qamtylǵan. Osy oraıda Majarstannyń «Karchag Kınche» óner mýzeıinde halqymyzdyń baı mádenıeti men ulttyq dástúrlerinen syr shertetin aýqymdy kórme ótip, ony 12 myńnan astam sheteldik tamashalaǵanyn aıtýymyz qajet. «Qazaqstannyń kóshpelileri: ótkeni men búgini» dep atalǵan óner jármeńkesi Almaty qalasynyń mýzeıler birlestigi, Almaty qalasy ákimdigi men Qazaqstannyń Majarstandaǵy Elshiliginiń qoldaýymen uıymdastyrylǵan. Ekspozısııaǵa qazaq halqynyń baı tarıhı, mádenı murasyn tanytatyn 200-den astam biregeı eksponat qoıylǵan. Kórmege kelýshiler nazaryna urpaqtar sabaqtastyǵynyń sımvolyna aınalǵan Abaı Qunanbaıulynyń dombyrasy men basqa da tarıhı jádigerler usynylǵan.
«Joba úlken qyzyǵýshylyq týdyrdy, bul elimiz ben Majarstan arasyndaǵy mádenı almasýdyń mańyzdylyǵyn kórsetedi. Buǵan deıin osyndaı kórmeler Túrkııa, Ońtústik Koreıa, Aýstrııa, Italııa, Chehııada ótken. Endi Serbııada «Uly Dalanyń mádenı murasy» atty kórme ashylady. Jalpy, qala bıligi mádenıet salasyn damytýǵa yqpal etetin túrli taǵylymdyq is-sharalarǵa, bilim alýǵa baǵyttalǵan, halyqaralyq baılanysty nyǵaıtýǵa múmkindik jasaıtyn jobalarǵa erekshe kóńil bólip otyr. Aıtalyq, mýzeı qyzmetkerleri álemniń úzdik mádenı ortalyqtarynda, sonyń ishinde áıgili Lývrda bilim alyp qaıtty», deıdi Almaty qalalyq mádenıet basqarmasynyń basshysy Ǵanı Maılybaev.
ALMATY