Bas prokýratýra esirtkige qatysty qylmys áreketteri kóbeıgenin málimdedi. Osyǵan qatysty qylmys sany 54 paıyzǵa jetken, dep jazady Egemen.kz.
Jyldam aqsha tabamyn dep jaýapkershilikke tartylyp jatqandardyń ata-anasy jazany jeńildetýdi suraıtyny jasyryn emes.
Bıyl zańsyz aınalymnan kólemi 18 400 keliden asatyn esirtki tárkilengen. Onyń 467 kelisi - sıntetıkalyq esirtki. Bas prokýratýranyń aqparatyna sáıkes, sońǵy 11 aıda esirtkini qaıta óńdep, satyp alyp nemese saqtaǵan 894 adam jaýapkershilikke tartylsa, 33-i kámeletke tolmaǵan bala.
«Stýdent ulym alańda birge oınap ósken dosynyń esirtkimen aınalysyp júrgen kýrator ekenin, ony qylmysqa jibergenin bilmegen. «Esirtki salynǵan paketti qolyna alyp, belgilengen jerge ony qoıýdy úıret», degen dıologty sotta biraq estidik. Bul esirtki saýdalaǵan eki adamnyń arasyndaǵy áńgime. Biraq ulym óz kóligimen birneshe ret dosyn, ıaǵnı esirtkimen aınalysqan kýratordy aıtqan mekenjaıǵa jetkizip júrgen. Ulym oqýyna ketetin kúni osy aýyr jaǵdaı boldy», deıdi jazasyn óteýshiniń anasy Gúlmıra Májnúnova.
Habar arnasynyń aqparatynsha, Gúlmıra Májnúnovanyń ulyna esirtkini uıymdasqan toppen birge satpaq boldy dep, 297-baptyń 3-tarmaǵy boıynsha úkim shyqqan. Zań boıynsha esirtkimen aınalysqan eresekter nemese kámelet jasyna tolmaǵandarǵa 10 jyldan 20 jylǵa deıin bas bostandyǵynan aıyrý jazasy bar. Sot sheshimi shyqsa múlki de tárkilenedi.
«18 myńnan astam azamat esirtkige táýeldi azamat retinde tirkeýde turady. Jylyna 3,5 myńnan astam azamatqa qylmystyq is qozǵalatyn bolsa, 2,5 myńnan astam azamat sottalady. Endi bir jylda osyndaı tendensııany baıqaıtyn bolsaq, 10 jylda 25 myń. Iаǵnı bir aýyldyń azamaty sottalyp keteıin dep tur. Elimizde azamattardyń isti bolýy jaqsy is emes», dedi zańger, sarapshy Raýan Qalıev.
Májiliste osyǵan qatysty zań byltyrdan beri qaralyp jatyr. Májilis usynylyp otyrǵan ózgeristerdi maquldasa esirtki tasyǵandar úshin 7 jyldan 12 jylǵa deıin bas bostandyǵynan aıyrylady.