Búgin Senatta Prezıdent tapsyrmasyna sáıkes ázirlengen jańa Bıýdjet kodeksiniń jobasy tanystyryldy, dep jazady Egemen.kz.
Jıynda jańa Kodeks bıýdjettiń halyqaralyq standarttar men qazirgi zamannyń syn-qaterine saı keletin ashyq, tıimdi jáne ıkemdi júıesin qurý maqsatyn kózdeıtini týraly aıtyldy.
Ulttyq ekonomıka vıse-mınıstri Azamat Ámrınniń aıtýynsha, jańa kodekstiń basty sıpaty fıskaldyq, salyqtyq jáne aqsha-kredıttik saıasattardyń úılesimdiligi bolyp otyr. Osy maqsatta respýblıkalyq jáne jergilikti bıýdjetter, Ulttyq qor jáne kvazımemlekettik sektor sýbektileri arasyndaǵy qatynastardy retteıtin jańa bólim engizilgen. Memlekettiń aktıvteri men mindettemelerin biriktirý, maqsatty transfertterdi paıdalaný boıynsha qatań erejeler engizý jáne olardyń tıimdiligin baǵalaý ólshem-sharttaryn belgileý mańyzdy sharalar retinde atap ótildi.
«Jańa Bıýdjet kodeksi ashyqtyqty arttyrý men esep berý isin jappaı engizýge baǵyttalǵan. Bul maqsatta bıýdjet derekterin jarııalaý, salyqtyq shyǵyndar týraly esepter engizý jáne olardyń tıimdiligin baqylaý josparlanyp otyr. Josparlaý rásimderi ońtaılandyrylyp, merzimder qysqartyldy, artyq kezeńder alynyp tastaldy. «Bıýdjettik suranys» quraly damý jospary men qarjylyq esepteýdi biriktirýge múmkindik beredi», delingen Senat habaralamasynda.
Al jergilikti bıýdjetterdiń qosymsha kiristeri joldar, turǵyn úı-kommýnaldyq sharýashylyq jáne basqa da mańyzdy jobalarǵa baǵyttalady, sondaı-aq óńirlerdiń ınfraqurylymdyq damýy basymdyqqa ıe bolady. Reforma sońǵy 14 jyldaǵy ózgeristerdi eskere otyryp, resýrstardy tıimdi paıdalaný men Qazaqstan ekonomıkasyn ornyqty damytýǵa baǵyttalǵan.