Memleket basshysy Qasym-Jomart Toqaev bıylǵy Joldaýynda keler jyldy Jumysshy mamandyqtar jyly dep jarııalady. Prezıdentimiz bul bastamasy arqyly jumysshy kásip salasyndaǵy kúrmeýli máselelerge kóńil aýdartýdy kózdegeni anyq. Búgin «Egemen Qazaqstan» gazetiniń qabyrǵasynda 2025 – jumysshylar jylyn naýqanshyldyqqa salmaı, ózekti túıinderdi tarqatýǵa yqpal etý arqyly laıyqty ótkizý máselesi qaýzaldy, dep jazady Egemen.kz.
Jıynǵa taqyryptyń salmaǵyn arttyryp, tuzdyq oı salarlyq sala mamandary qatysty. Atap aıtsaq, Májilis depýtaty Nurgúl Taý, «Eńbek resýrstaryn damytý otralyǵy» AQ vıse-prezıdenti Shalqar Baıqulaqov, Kásiptik tehnıkalyq kolledji dırektorynyń orynbasary Omarbek Orynbekuly, Astana qalasy ákimdiginiń «Eńbek mobıldiligi ortalyǵy» (Jumyspen qamtý ortalyǵy) Jumys berýshilermen baılanys bóliminiń basshysy Meıramgúl Imasheva, Astana Polytechnic kolledj dırektorynyń orynbasary Maıra Sembına, temirjolshy, «QR Qurmetti qaıratkeri» temirjolshylar dınastııasynyń ókili Kendaı Ahmetov, Astana Polytechnic kolledj dırektorynyń orynbasary Maıra Sembına men bas basylym jýrnalısteri qatysty.
«Egemen Qazaqstan» gazeti bas redaktorynyń orynbasary Qýat Áýesbaı moderatorlyq etken oı-talqy jumysshy maman men eńbek adamynyń ara jigin ajyratýdan bastaldy. Alǵash bolyp sóz alǵan májilis depýtaty Nurgúl Taý boıyndaǵy praktıkalyq daǵdysyna qujattary saı tulǵalardy alǵashqy topqa qosatynyn aıtyp, kábı bilim berý júıesi men óndiris oshaqtarynyń tyǵyz baılanys ornatýy olqylyqtyń ornyn toltyrýǵa septesetinin alǵa tartty.
«Balalardyń qandaı mamandyqqa beıim ekenin zertteý mańyzdy. Ol anyqtalǵan soń sol baǵytta jol kórsetip, oqýǵa túsýge baǵyttaý kerek. Bizdiń elimizdiń eńbek naryǵy qandaı mamandarǵa muqtaj ekenine analız jasaýy tıis. Qorytyndydan keıin ǵana sol mamandyqtardy oqytýǵa basymdyq berilýi shart», dedi Nurgúl Taý.
Al Astana Polytechnic kolledj dırektorynyń orynbasary Maıra Sembına kúndelikti aldyna keletin stýdentterdiń talabyn, tilegin ortaǵa saldy. Onyń birinshisi - kolledjdiń materıaldyq-bazalyq jaǵdaıyn zaman úrdisine ilestirý, tehnologııalardy ýaqytyly oqý ornyna jetkizip, ony qoldaný daǵdysyn shákirtterge meńgertý.
«Oqytý úderisine óndiristen kásibı maman tartý qıynnyń-qıynyna aınaldy. Biz sondaı mamandy 1 jyl boıy izdedik. Biz usynǵan jalaqydan ózderiniń sehynda tapqan tabysy áldeqaıda joǵary. Sondyqtan óndiris sheberleri shákirt oqytýǵa qulyqty emes. Odan keıin kolledj jataqhanalaryn turmysqa qolaıly etip salýǵa kóńil bólinýi tıis. Jańa, zamanaýı jaıly mektepte oqyp kelgen balanyń oqý ǵımaraty men jataqhanaǵa qoıar talaby da joǵary bolady. Sonymen birge kolledjderdiń salynatyn orny da qala syrtynda emes, kerisinshe qalanyń ortalyǵynda, kórikti aımaqta bolǵany da oqýshylardyń kolledj tabaldyryǵyn attaýyna yqpal eteri sózsiz», dedi Astana Polytechnic kolledj dırektorynyń orynbasary Maıra Sembına.
Oı-talqy barysynda kásiptik tehnıkalyq kolledji dırektorynyń orynbasary Omarbek Orynbekuly óndiris sheberlerin oqytý úderisine tartý úshin quptarlyq tetik usyndy.
«Oqýshylardyń kolledjge at basyn bura bermeýiniń sebebi - bitiretin mamandyǵynyń jalaqysy mardymsyz ári óndiris oshaqtary jas mamannan tájirıbe talap etip jatady. Munyń sebebi óndiristiń keı tehınkasyn qoldanarda asa tııanaqtylyq qajet. Olar jas mamandy úıretkennen sheteldik tis qaqqan mamanǵa júginýdi qolaı kóredi. Bul áreketterdiń artynda Qazaqstan ekonomıkasyna selkeý túsiretin kóleńkeli tus baryn ańdamaıdy. Al jumysshy sheberlerdiń oqý ornynda sabaq berýge yqylasty etý úshin, jumys ornyndaǵy jalaqysyn saqtaı otyryp, bilim bergeni úshin qosymsha eńbekaqy berý kerek», degen usynysyn jetkizdi Omarbek Orynbekuly.
Astana qalasy ákimdiginiń «Eńbek mobıldiligi ortalyǵy» (Jumyspen qamtý ortalyǵy) Jumys berýshilermen baılanys bóliminiń basshysy Meıramgúl Imasheva naryqta jumysshy mamandarǵa suranys jetkilikti ekenine nazar aýdardy. Keı jaǵdaılarda qolynan is keletin mamannyń qolynda dıplomy bolmaýy jumysqa ornalasyp ketýge kedergi keltiretinin atap ótti.
Jıynǵa qatysýshylar jumysshy mamandar jylyn mazmundy etý úshin olardyń mártebesin kóterýge den qoıý bastamasyn qoldady. Bul baǵyttaǵy áreket jumysshy mamandardyń eńbegin elge nasıhattaýdan bastalý kerek. Ideologııalyq turǵyda máseleni tamyrynan sheshý úshin otbasy men qoǵamda jaǵymdy kózqaras qalyptastyrý alǵyshart.