Senat depýtaty Nurtóre Júsip Memleket basshysynyń «Ana tili» gazetine bergen suhbatyna oraı Facebook áleýmettik jelisinde óz pikirin ortaǵa saldy, dep habarlaıdy Egemen.kz.
Nurtóre Júsip áleýmettik jelidegi paraqshasynda Prezıdent Qasym-Jomart Toqaev «Ana tili» gazetine keń kólemde suhbat bergenin atap ótip, qoǵam men memlekette bolyp jatqan ózgeristerdi tolyq saralap, kópti tolǵandyrǵan biraz saýalǵa ashyq jaýap bergenin jazdy.«Sondaı suraqtyń biri mynadaı:«Qazaqstandy parlamenttik basqarý júıesine kóshirý úshin irgeli reforma daıyndalyp jatyr degen aqparat tarady. Shynymen solaı ma?»
Memleket basshysy:– Árıne, parlamenttik basqarý júıesi de jumys júrgizýge qaqyly. Bul júıe Eýropadaǵy, tipti Azııadaǵy birqatar elde ábden ornyǵyp, tamyryn tereńge jaıǵan. Biraq bıliktiń ámbebap formýlasy joq. Ár memleket saıası júıesin tańdaǵan kezde tól tarıhyna, ulttyq bolmysyna, saıası tájirıbesine súıenedi. Meniń apparatym álemdik tájirıbeni muqııat zerdelep jatyr. Postkeńestik elderde parlamenttik basqarý júıesi jaqsy qyrynan kórine alǵan joq degen pikirge kelisesiz dep oılaımyn. Grýzııadaǵy sońǵy oqıǵalar osy paıymǵa naqty dálel bola alady.
Memlekettik bıliktiń saıası júıesin tańdaý – aıryqsha jaýapty sheshim. Mundaı sheshimder úrkerdeı toptyń ońasha basqosýynda emes, tek qana jalpyhalyqtyq referendýmda qabyldanýy kerek. Meniń «Kúshti Prezıdent – Yqpaldy Parlament – Esep beretin Úkimet» atty tujyrymdamam Qazaqstannyń saıası júıesine eń qolaıly tujyrymdama ekenine senimdimin. Biraq ony tolyǵymen júzege asyrý úshin biz áli talaı jumys isteýimiz kerek. Prezıdenttik basqarý tásili Qazaqstan úshin qazir de, taıaý kezeńde de eń utymdy tásil dep senemin.
Memleketimizdiń turaqty ári ornyqty damýyna zııany tıetin sheshim qabyldaýǵa meniń de, siz ben bizdiń de esh qaqymyz joq. Mundaı máselege baılanysty qatelikke jol berýge bolmaıdy. Túptep kelgende, Konstıtýsııaǵa engizilgen ózgeristiń bári – Parlamenttiń reformalanýy, aýyl, aýdan jáne qala ákimderiniń saılanýy, Ulttyq quryltaıdyń qurylýy jáne, eń bastysy, zań ústemdiginiń basymdyqqa aınalýy – osynyń barlyǵy saıası toqyraýǵa ushyramaýǵa senimdi kepildik beredi.
Taǵy bir suraq:
«Elimizde merziminen buryn parlament saılaýy bola ma? Bul týraly qazir jıi aıtyla bastady».
Buǵan da Prezıdent búkpesiz jaýap beripti.
– Mundaı boljamdar bar ekenin bilemin. Bul aqparat ádeıi taratylyp jatyr dep oılaımyn. Bizdiń elde jańa Úkimet jumysyna kirisken bette onyń otstavkaǵa ketetini týraly áńgime taraıdy. Parlament týraly da dál solaı deýge bolady. Men Parlament depýtattary azamattyq jáne saıası jaýapkershilik tanytyp, jaqsy jumys istep jatyr dep oılaımyn. Al Úkimet – aýys-túıiske beıim qurylym. Onyń quramynda túrli jaǵdaıǵa, onyń ishinde «Amanat» partııasynyń jáne Parlamenttegi basqa da partııalardyń ustanymyna baılanysty ózgerister bolýy múmkin.
Menińshe, Parlament saılaýyn merziminen buryn ótkizýge ázirge esh negiz joq. Saılaý zańda belgilengen merzimderge sáıkes ótedi. Parlament ózine tıesili merzim aıasynda qyzmetin atqarýǵa qulyqty. Al Úkimet bekitilgen baǵdarlamalar men josparlarǵa sáıkes áreket etip, oń nátıjege jetý úshin jumys istep jatyr. Strategııalyq mindet – turaqty áleýmettik-ekonomıkalyq damýdy qamtamasyz etý, elimizdiń óńirdegi kóshbasshy mártebesin nyǵaıtý».
Memleket basshysy budan da basqa birtalaı ózekti máseleni ortaǵa salǵan», dep jazdy Nurtóre Júsip.