2 qańtarda aýdandyq aýrýhanaǵa Zerendiniń kishkentaı turǵyny shuǵyl jetkizilgen. Rentgen arqyly balanyń ishegine bógde zat túskeni anyqtalǵan, dep habarlaıdy Egemen.kz.
«Balany birden tekserip, shuǵyl operasııaǵa daıyndaý úshin jansaqtaý bólimine baǵyttadyq. Der kezinde qaralmaǵan soń bógde zat toq ishek pen ash ishekke shashyrap ketken. Otany tájirıbeli dáriger, bólimshe meńgerýshisi Ernar Qojabekov jasady. Men kómektestim. Laporoskopııalyq tireýishtiń, monıtordyń kómegimen biz 39 magnıttik shardy shyǵaryp aldyq. Úsh kún ishinde olar ishekti zaqymdap, toq ishek pen ash ishekti tesip úlgergen. Bul operasııa barysyn qıyndatty. Sondyqtan ota bes saǵatqa sozyldy. Sonymen qatar aǵzada perıtonıt shyǵyp, iriń ishekke ótken», dedi balalar hırýrgi Sálimjan Jaqypov.
Onyń aıtýynsha, osyǵan uqsas jaǵdaı jarty jyl ishinde úshinshi ret tirkelip otyr. Buǵan deıin 12 jáne 24 dana magnıt jutqan balalar kezdesken.