Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen Úkimette shegirtkege qarsy kúreske daıyndyq jáne kóktemgi dala jumystaryna ázirlik barysy týraly málimetter talqylandy.
Aýyl sharýashylyǵy vıse-mınıstri Ermek Kenjehanulynyń aıtýynsha, 2024 jyly hımııalyq óńdeý úshin 247 birlik tehnıka paıdalanylsa, 2025 jyly bul san 443-ke ulǵaımaq. Onyń ishinde 46 agrodron bar, olardy Aýyl sharýashylyǵy mınıstrligi «Fıtosanıtarııa» RMK-niń aımaqtyq bólimshelerine satyp alǵan. Sondaı-aq 7 zertteý drony alynǵan.
«Túrkistan oblysynda ótken jyldyń kókteminde agrodrondar arqyly alqaptardy búrký jáne pestısıdterdi satyp alý, tasymaldaý, saqtaý jáne óńdeýdi qosa qamtıtyn ortalyqtandyrylǵan qyzmetti qanatqaqty synaqtan ótkizý jasaldy. Sonyń nátıjeleri boıynsha Aýyl sharýashylyǵy mınıstrligi fıtosanıtarlyq sharalardy barlyq óńirde «Bir jetkizýshi – barlyq jumys» qaǵıdaty boıynsha uıymdastyrýdy engizdi. Bul bızneske atalǵan qyzmetterdi satyp alýǵa qatysýdy tartymdy etip, jaýapkershilikti arttyrady. Budan bólek, fermerler men hımııalyq óńdeý qyzmetterin jetkizýshilerge agrodrondar, jerústi jeldetkishti jáne shtangaly búrikkishter qunynyń 25%-yn óteý arqyly qolaıly jaǵdaı jasadyq», dedi Ermek Kenjehanuly.
Sondaı-aq otyrysta aımaqtardyń kóktemgi dala jumystaryna daıyndyǵy qaraldy. 2024 jyly 29 qarashada bastalǵan erte qarjylandyrý aıasynda bólingen 100 mlrd teńgeniń 70 mlrd teńgesi 671 aýyl sharýashylyǵy óndirýshisine baǵyttaldy. Bul qarjyny eń belsendi paıdalanǵandar – dándi daqyldar egetin aımaqtar: Aqmola (15,4 mlrd teńge), Qostanaı (14,9 mlrd teńge) jáne Soltústik Qazaqstan oblystary (14,5 mlrd teńge). Ońtústik aımaqtarda – Túrkistan, Jambyl jáne Jetisý oblystarynda, kóktemgi egis jumystary erterek bastalatyn aımaqtarda, ótinimder somasy nebári 10 mlrd teńgeni quraıdy.
Aımaqtardyń aldyn ala málimetinshe, respýblıkada kóktemgi dala jumystaryna aýyl sharýashylyǵy tehnıkasynyń daıyndyǵy qazir shamamen 56%-dy quraıdy. 2024 jyly ónimge arnalǵan tuqymǵa degen qajettilik 2,3 mln tonna bolsa, onyń 99%-y daıyndalǵan.
Keńes qorytyndysynda Serik Jumanǵarın egistik alańdarynyń qurylymyn qaıta qaraýdy – bıdaı egý alqaptaryn qysqartyp, maıly daqyldar men basqa da joǵary tıimdiligi bar daqyldardy kóbeıtýdi tapsyrdy. Sondaı-aq 2024 jyly ónimde eń joǵary nátıje kórsetken otandyq seleksııanyń elıtalyq tuqymdaryn egý alańdaryn barynsha ulǵaıtý qajettigin aıtty.
Kelesi sársenbide Serik Jumanǵarın kóktemgi egis jumystaryna daıyndyq barysymen tanysý jáne ekonomıkanyń naqty sektorynyń damýyn talqylaý úshin ońtústik óńirlerdiń birine barýdy josparlap otyr. Budan buryn habarlanǵandaı, 2024 jyly 30 jeltoqsanda Premer-mınıstrdiń orynbasary – Ulttyq ekonomıka mınıstri Qaraǵandy oblysynda bolyp, vedomstvonyń jumysy óńirlerdegi jumyspen kiriktiriletinin málimdegen edi.