Aqtóbe oblysyndaǵy balabaqshalardyń birinde botqaǵa jándikter qosylǵan. Ashynǵan ata-analar áleýmettik jelide oqıǵanyń vıdeosyn jarııalady. Jaǵdaıǵa Aqtóbe oblysynyń bilim basqarmasy túsinikteme berdi, dep habarlaıdy Egemen.kz.
Bilim basqarmasynyń málimetinshe, balabaqsha meńgerýshisi jáne taǵy eki qyzmetker jumystan bosatylǵan.
«13 qańtarda Qandyaǵash qalasynyń «Samal» balabaqshasynda jaǵymsyz oqıǵa boldy. Tańǵy asqa ádettegideı, arpa botqasy daıyndaldy. Jumysshylar synama alyp, biraq eshteńe tappady. Tabaqtarǵa salynǵannan keıin botqadan jándikter tabyldy. Balalarǵa botqa berilmedi. Bolǵan oqıǵadan keıin keıin balabaqsha meńgerýshisi, medbıke jáne aspaz jumystan bosatyldy», dedi Aqtóbe oblysy bilim basqarmasy basshysynyń m.a. Nurgúl Bertileýova.
Esterińizge sala keteıik, áleýmettik jelide qurt-qumyrsqaǵa toly botqanyń vıdeosy tarady. Aqtóbe oblysy Muǵaljar aýdandyq bilim bólimi qazir balabaqshada tekserý júrip jatqanyn habarlady.