Almaty halyqaralyq áýejaıynda Almaty-Astana baǵytyndaǵy FS 7057 reısiniń jolaýshysy FlyArystan qyzmetkerine til tıgizip, judyryq ala júgirgen, dep habarlaıdy Egemen.kz.
Áýe kompanııasynyń habarlaýynsha, oqıǵa 14 qańtarda bolǵan. Jolaýshy tirkeý ornyna ushyp shyǵýǵa 30 mınýt qalǵanda kelip, reıske tirkelgenin rastaǵannan keıin tekserý aımaǵyna ótken. Alaıda otyrǵyzý 30 mınýt buryn júrgiziletindikten, ol reıske úlgermeı qalǵan.
Keıin áıel tirkeý aımaǵyna oralyp, ony tekserý aımaǵyna baǵyttaǵan ofıserge agressıvti áreket kórsete bastaǵan. Oqıǵa barysynda ol qyzmetkerdiń telefonyn laqtyryp jiberip, beti men ishine soqqy jasap, sózben qorqytýyn jalǵastyrǵan. Bul áreketti beınebaqylaý kameralary men kýágerler túsirip alǵan.
«FlyArystan áýe tasymaldaýshysy óz qyzmetkerlerine jáne basqa jolaýshylarǵa qatysty zorlyq-zombylyqtyń kez kelgen túrine, sonyń ishinde fızıkalyq shabýyldarǵa, qorqytýlar men balaǵat sózderge nóldik tózimdilik saıasatyn qatań ustanatynyn eske salady. Destrýktıvti minez-qulyq kórsetken jolaýshy qoldanystaǵy zańnamaǵa sáıkes jaýapqa tartylady. Áýe kompanııasy óz qaýipsizdik saıasaty aıasynda tıisti sharalardy qoldaný quqyǵyn, sonyń ishinde jolaýshyny qara tizimge engizý múmkindigin saqtap qalady. Biz ár jolaýshynyń óziniń minez-qulqy men basqalarǵa qurmet kórsetý normalaryn saqtaýǵa tolyq jaýapty ekenin erekshe atap ótemiz. Reıske ýaqytynda kelý – bul jolaýshynyń jeke jaýapkershiligi ekenin este ustaý mańyzdy», delingen habarlamada.