Atyraýda Jaıyq ózeniniń jaǵalaýynda qutqarý stansasy ashyldy. Jańa nysannyń qurylysy 2,5 aıda jedel júrgizildi.
Tótenshe jaǵdaılar mınıstri Shyńǵys Árinovtiń aıtýynsha, biregeı qutqarý stansasynyń TMD elderi aýmaǵynda balamasy joq. Qurylysyna joǵary sapaly ári tez qurastyrylatyn modýldik materıaldar qoldanyldy.
«Qutqarý stansasynyń ashylýy – Atyraý oblysy turǵyndarynyń qaýipsizdigin qamtamasyz etý maqsatyndaǵy mańyzdy qadam. Ony salý, zamanaýı jabdyqtarmen jabdyqtaý jyldamdyǵy qutqarýshylarymyzdyń joǵary kásibıligin kórsetti. Osyndaı bólimshelerimizdiń ınfraqurylymy men jabdyqtalýyn jaqsartyp, turǵyndardy qorǵaý baǵytynda ınnovasııalyq, tıimdi sheshimderdi engizýdi jalǵastyra beremiz», dedi Sh.Árinov.
Qutqarý stansasynda jumys kabınetteri, dıspetcherlik, qutqarýshylarǵa arnalǵan demalys, kıim aýystyratyn, as ishýge arnalǵan, jýynatyn bólmeler bar. Aýmaǵynda arnaıy tehnıka men júzý quraldaryna arnalǵan boks ashyldy. Jańa stansanyń janynan qutqarýshylardyń otbasylaryna arnalǵan eki qabatty, 11 bólmeli jataqhana boı kóterdi. Oǵan stansa qyzmetkerleriniń otbasylary qonystandy.
Mınıstr jergilikti departamentke avarııalyq-qutqarý jumystaryna arnalǵan jańa kólikterdiń kiltin tabys etti. Osy zamanǵy qutqarý quraldarymen jabdyqtalǵan mashınalardy satyp alýǵa respýblıkalyq bıýdjet esebinen arnaıy qarjy bólinipti. Sondaı-aq sý aıdyndarynda qutqarý operasııalaryn júrgizýge biregeı júzý quraly – «Alligator» aeroqaıyǵy berildi.
«Byltyr atyraýlyq qutqarýshylar 559 ret shaqyrtýǵa baryp, 100-den astam adamdy, onyń ishinde 70 balany qutqardy. Aýqymdy sý tasqyny kezinde jedel-qutqarý jasaǵynyń qyzmetkerleri 3 myńnan astam jergilikti turǵyndy qaýipsiz jerge evakýasııalady. Bıyl Jaıyq ózeninen 9 turǵyn qutqaryldy. Onyń ishinde 4 bala bar», dep málimdedi oblystyq departamenttiń ımıdjdik jumys jáne syrtqy kommýnıkasııalar tobynan.
Atyraý oblysy