Almatydaǵy Dostyq úıinde Mádenıet jáne aqparat mınıstri Aıda Balaevanyń qatysýymen ádebıet pen óner qaıratkerlerine memlekettik stıpendııa tabystaý saltanaty ótti. Prezıdent ókimine sáıkes 2024 jyly memlekettik stıpendııaǵa 75 adam ıe boldy.
Ádebıet pen óner salasyndaǵy arnaıy stıpendııa jyl saıyn qurmetti ataqtar men memlekettik nagradalarǵa ıe bolǵan shyǵarmashylyq maıtalmandaryn, mádenıet qaıratkerlerin, sondaı-aq el rýhanııatyn qalyptastyrýǵa, saqtaýǵa jáne damytýǵa úles qosqan talant ıelerin qoldaý maqsatynda berilip keledi.
Aıtýly tizimge esimi engen azamattarǵa sertıfıkat tabystaǵan mınıstr Aıda Balaeva óner men mádenıette kórinis tapqan eleýli jetistikterdi saralap, memleket tarapynan salany qoldaýǵa baǵyttalyp jatqan jumystar týraly atap ótti.
– «Dana Abaıdan bastap qazaqtyń árbir jazýshysy, aqyny, óner maıtalmany júreginde ustap, el-jurtyna amanat etken eskirmeıtin uly qaǵıda bar: «Mádenıet pen ádebıet – ulttyń rýhyn uly bıikterge kóteretin qos qanat». Búgin, mine, osy ortada sol talapty ómirlik qaǵıdaty etip, shyǵarmashylyq izdenisin halqymyzdyń rýhanı ósip-órkendeýine arqaý qylǵan bir top azamatty qurmetke bólep otyrmyz. Sóz joq, bul – eń aldymen Sizderdiń uzaq jylǵy tabysty eńbekterińizdiń nátıjesi. Prezıdenttiń osy eńbekti joǵary baǵalap, ulttyq ádebıet pen ónerimizge erekshe kóńil bólip, árdaıym qoldaýynyń arqasy. Bul sizderdiń el úshin asa mańyzdy shyǵarmashylyq jumystaryńyzǵa jańa múmkindik, keń óris ashatynyna senimim mol. Prezıdent Qasym-Jomart Toqaevtyń ulttyq rýhanııat týraly únemi aıtyp, onyń eldik jolyndaǵy orasan kúshi men mol múmkindikterine qoǵamnyń nazaryn aýdaryp júrgenin jaqsy bilesizder. Jyldaǵy halyqqa arnaǵan Joldaýlary, Ulttyq quryltaıdaǵy bastamalary, túrli suhbattarynyń ózeginde táýelsizdik pen otanshyldyq, birlik pen yntymaq, ádildik pen jaýapkershilik, zań men tártip, jasampazdyq pen jańashyldyq sııaqty búgingi Qazaqstanǵa aýadaı qajet qundylyqtar jatyr. Jáne eń mańyzdysy bul qundylyqtar uran emes, el júregine ózderińizdeı zııaly qaýym arqyly, sizderdiń shyǵarmalaryńyz ben kúndelikti qoǵamdyq mıssııalaryńyz arqyly jetetin dúnıeler. Halyqty birlikke shaqyrý, tatýlyqty nyǵaıtý, jas urpaqqa izgi qundylyqtardy sińirý – mine, bul siz ben bizdiń, ıaǵnı zııaly orta men memlekettiń ortaq múddesi. О́ıtkeni Prezıdenttiń qaı kezeńde bolsyn kótergen bastamalary sapaly ult qalyptastyrýdy maqsat etedi. Al elimizdiń baı rýhanı murasy sizderdiń týyndylaryńyz arqyly jańǵyryp, urpaqtan-urpaqqa jalǵasyp keledi, – dedi A.Balaeva.
Stıpendııaǵa ıe bolǵandar qatarynda Asanáli Áshimov, Bıbigúl Tólegenova, Oljas Súleımenov, Dýlat Isabekov, Iranbek Orazbaev, Nurǵalı Núsipjanov, Núketaı Myshpaeva, Tuńǵyshbaı Jamanqulov, Tólen Ábdikuly, Merýert О́tekeshova, Esmuhan Obaev, Amandos Aqanaev, Tatıana Tarskaıa, Gýlver Razıeva, Nurtas Isabaev, Zeınep Ahmetova jáne basqa da kórnekti mádenıet pen ádebıet qaıratkerleri bar.
– Bizge qurmet kórsetip jatqan el basshysyna, qazaq halqyna alǵys aıtýǵa tıispiz. О́tken jyl qalamgerler qaýymy úshin tabysty, mereıli jyl boldy. Birqatar aqyn-jazýshynyń eńbegi baǵalandy. Stıpendıattar qatarynda talantty jastardyń bolǵany kóńil qýantady. Bul – ult ádebıetine, mádenıetine jasalǵan qurmet, – deıdi Memlekettik syılyqtyń laýreaty, aqyn Aqushtap Baqtygereeva.
Basqosý barysynda mınıstr rýhanııattyń kóshin alǵa súırep kele jatqan aǵa býynnyń lebizi men usynys-tilekterin tyńdap, olardyń el birligin nyǵaıtý jáne ulttyq qundylyqtardy nasıhattaý isinde mańyzdy ról atqaratynyna senim bildirdi.
ALMATY