«Áleýmettik ámııan» baǵdarlamasy aıasynda qanatqaqty joba bastaldy. Batys Qazaqstan oblysynyń ataýly áleýmettik kómek jáne turǵynúı járdemaqysyn alatyn 840 turǵyny tuńǵysh ret sıfrly vaýcherdi paıdalanyp, tabıǵı gaz aqysyn jeńildikpen tóledi, dep jazady Egemen.kz.
Aıta keteıik, 2024 jyldyń jeltoqsan aıyna deıin mundaı turǵyndarǵa kórsetiletin jeńildik alýdyń mashaqaty kóp edi: ákimdikke áleýmettik kómekke muqtaj jandardyń tizimi jiberiledi, keıin derekter abonentter bazasyndaǵy málimetpen salystyrylady. Bir adam mekenjaıyn aýystyrsa nemese keıbir derekter qate tússe, muqtaj jan kómekten qaǵylady.
Sondyqtan 2024 jyldyń jeltoqsan aıynan bastap elimizdiń Energetıka mınıstrliginiń qoldaýymen Eńbek jáne halyqty áleýmettik qorǵaý mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrligi, «QazaqGaz Aimaq» AQ birigip, eGov Mobile júıesinde «Áleýmettik ámııan» baǵdarlamasy arqyly jańa sıfrlyq júıeni iske qosqan edi.
Mine, qazir barlyq úrdis avtomattandyrylǵan. Joǵarydaǵy azamattarǵa endi 1414 nómirinen jeńildik jóninde SMS-habarlama kelip túsedi. Olar baǵdarlamaǵa qatysatynyn rastap, ózderiniń jeke shotyn kórsetedi. Boldy. Bul qanshama ýaqytty únemdeýge, qatelikterdi boldyrmaýǵa áser etip jatyr. Ári áleýmettik kómektiń ashyqtyǵy men qol jetimdi bolǵanyn aıtyńyz.
- Pılottyq joba retinde sıfrlyq júıeniń enýi turǵyndardy áleýmettik qoldaý salasyn damytýǵa erekshe áser etedi. Qazir «QazaqGaz Aimaq» AQ júıeni odan ári jetildirý úshin monıtorıng jasap jatyr. Árbir muqtaj azamat áleýmettik kómekten tys qalmaýy tıis, - deıdi bizge jaǵymdy jańalyqty jetkizgen Batys Qazaqstan oblysy ákiminiń baspasóz hatshysy Erhan Tátken.
Búginde Batys Qazaqstan oblysy 99,8%-ǵa tabıǵı gaz júıesimen qamtamasyz etilgen. Gaz qubyrlarynyń jalpy uzyndyǵy 10 063 shaqyrymǵa sozylyp jatyr. Kógildir otyndy qaýipsiz tasymaldaý, tutynýshyǵa jetkizý salasynda «QazaqGaz Aimaq» aksıonerlik qoǵamy BQO fılıalynyń 536 jumysshysy eńbek etip keledi.